Etzi, igandearekin, Bizkaiko Dantzari Eguna ospatuko dute Getxo udalerrian. Orotara, mila dantzari inguru elkartuko dira, antolatzaileen arabera. Horrenbestez, kalejira 10:45ak aldera hasiko da Algortako Telletxe plazan, Faduraraino heltzeko; Telletxe, Sarrikobaso, Salsidu etorbidea, Villaondoeta eta Makaleta etorbidea zeharkatuz. Dantzen erakustaldia 11:30etik 13:30era egingo dute, Fadurako rugby zelaian. Hori bukatuta, garraio berezia jarriko diete dantzariei Getxo aldera joateko. 14:00etatik 21:00etara sei autobusek egingo dituzte Andra Mari eliza ingurua eta Fadura arteko bidaiak. Getxon, Luhartz taldearen erromeria izango dute dantza taldeetakoek, 17:00etatik aurrera, San Isidro jaiekin bat eginez. Aipatzea, Bizkaiko Dantzari Eguna dela eta, Algorta eta Getxon zirkulazioa bideratzeko dispositibo berezia ezarriko duela igandean Udaltzaingoak. Horrekin, udalerrira helduko diren autobusen eta autoen joan-etorriak erraztu nahi dituzte, tokiko arduradunek aipatu dutenez. Argazkian, Itxas Argia taldeko hainbat dantzari / cc-by Egizu Getxo Euskaldun!.
Eragin gehien jasango dituzten inguruak hauek izango dira: Algortako Telletxe kalea, Makaleta etorbidea, Fadura kiroldegi ingurua, Getxo ingurua eta Gabriel Ramos Uranga kalea. Lehenengo autobusak goizeko 9:30ak aldera helduko dira Telletxe kaleko bus geltokira. Horietan mila bat dantzari jaitsiko dira, ondoko plazan batzeko. Ondoren, autobus horiek Fadurara abiatuko dira, kiroldegiko aparkalekuan eta bi norabideetako karriletan aparkatzeko. Guztira, 100 bat autobus heltzea aurreikusi dute arduradunek. Horietatik, 35 bat Faduran geldituko dira eta 65 Makaletako etorbidean, Fadura eta Zubietako biribilguneen artean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun