"El Correo Español" egunkariak gaur zabaldutako inkestaren arabera, zerrenda abertzaleek gehiengo osoa izango lukete Getxo udalerrian. Izan ere, Ikerfel enpresak apirilaren 21etik 29ra egindako ikerketak botoen %38,3 eta 11 zinegotzi egokitzen dizkio EAJri datozen udal hauteskundeetan eta %9,4 eta 2 hautetsi Bilduri. Aralarrek, ordea, ez luke ordezkaritzarik lortuko botoen %3,3rekin. Bestalde, alde konstituzionalistan eta federalistan, PPk 9 zinegotzi lortuko lituzke, boto-txartelen %29,9rekin. PSE-EEk, berriz, hiru hautetsi eskuratuko lituzke, botoen %10,1ekin. Ezker Batua eta UPyD udaletxetik kanpo geldituko lirateke botoen %4 eta %2,1ekin, hurrenez hurren. Azkenik, PSyV, independenteak eta PUM+J, guztiak bilduta, %2,9ko emaitza baino ez lukete izango. Dena den, inkesta egin zen datengatik ez ditu kontuan hartzen hauteskunde kanpainako gora-beherak. Are garrantzitsuago, ikerketa burutu zen datetan oraindik ez zen jakina Bilduren zerrendak legalak izango ote ziren. Inkesta 650 elkarrizketa telefonikoen bidez egin zen eta akats-tartea %3,92koa omen da. Argazkian, Maitane Nerekan Bilduko zerrendaburuarekin egin lezake gobernu akordioa Imanol Landa jeltzaleak.
Aurretik, Getxo udalerriari buruzko beste hauteskunde azterketa egin zuen Ikerfel enpresak, kasu horretan "Deia" egunkariarentzat. Ikerketa 2011ko martxoaren lehenengo hamabostaldian burutu eta apirilaren 6an ezagutarazi zen. Orduan, antzeko emaitza jaso zuen EAJk (%38,4), hamabigarren zinegotziaren tenorean. Bilduri dagokionez, koalizioa aurkeztuta egon arren Ikerfelek bananduta galdetu zuen gerora Espainiako Auzitegi Gorenak ilegalizatuko zuen Sortu (%7,4 eta bi zinegotzi) eta Eusko Alkartasuna alderdiengatik (%0,8). Hortaz, Bilduren kasuan%1,2ko igoera emango litzateke martxo eta apirila bitartean. Aralarren kasuan, esan daiteke Bilduren eboluzioak kaltetu dituela Nahikari Ayok gidatzen duen zerrendaren aukerak, martxoan %4,1 biltzen zuelako eta apirilean %3,3, hots, %0,8 gutxiago.
Konstituzionalisten kasuan, berriz, boto aldaketa PSE-EEtik PPra emango litzateke. Martxoan, PSE-EEri %14,9 egokitzen bazioten eta PPri beste %26,5, PSE-EEk %4,8 galdu eta popularrek %3,4 batuko luketelako. Azkenik, martxoko datuen arabera, UPDk %3,8 batu behar zuen eta EBk %2,7.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.