Iturgaizen esanetan, Rodriguez Zapatero Espainiako Gobernuko presidenteak "suntsitu" egin du Espainia, eta "ETA Udaletan sartu du". Era berean, PSE-EEk Bildurekin hitzarmenetara helduko dela iragarri zuen, "hori baita sozialistek abiatutako prozesuaren hurrengo urratsa". Bilduren atzean zeintzuk dauden argi dagoela uste du eurolegebiltzarkideak: "Bildu ETA da. Otegik, Erkiziak, De Juanak, 'Ternera'-k eta 'altxor' horiek Bilduren alde bozkatuko dute, ETAri munizioa emateko".
Horien aurrean PP dela bermerik onena esan zuen: "Euskadiko PP terrorismoaren sugeari burua mozteko dago politikan". Bitartean, "beste batzuk sugearen arrautzak udaletan eta erakundeetan jartzeko" ari direla gaineratu zuen Iturgaizek.
Carlos Iturgaiz Areetako bizilaguna eta Uribe Kostako eurolegebiltzarkide euskaldun bakarrak Espainiako Gobernuaren eta Bilduren aurkako salaketa gogorrak egin zituen pasa den larunbatean PPk Barakaldon egindako mitinean. Zapaterok zuzentzen duen Gobernuak Bildu koalizioa hauteskundeetan egotea ahalbidetu duelakoan, "Espainiari, askatasunari, demokraziari eta terrorismoaren biktimei traizio egitea" leporatu zion "borreroak udaletan sartzea" posible egiteagatik. Bestalde, Bildu bozkatuko duenei honako abisua eman zien: "Botoa Bilduri ematen dionak munizioa emango dio ETAri". Baina, boto emaileei ez ezik koalizioko hautagaientzat ere irain zakarrak izan zituen: "Badakigu zein den horien hauteskunde programa: zinegotziei buruzko informazioa pasatzea, abertzale ez direnei bizimodua ezinezko egitea eta EAJren babesarekin Espainiarekin lotura apurtzeko planean aurrera egitea". Argazkia: © EAEko Alderdi Popularra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun