Ostiralera arte daukate udan saharar ume bat etxean hartu nahi duten familia getxoztarrek
Tindouf-eko (Aljeria) errefuxiatuen kanpamentuetatik umeak ekarriko ditu aurten ere Atfal Sahararen aldeko elkarte getxoztarrak, uztaila eta abuztua gure artean igaro dezaten. Gauzak horrela, ostiralera arte izango dute udalerriko familiek 7 eta 12 urte arteko neska-mutil horietako bat hartzeko aukera. Ekimen horretan parte hartu nahi duten lagunek aipatu elkartearekin edo Getxoko Udalarekin harremanetan jarri beharko dute. Egitasmo horren bitartez, umeei mediku-azterketa eta elikagai egokiak eskaintzeaz gain, neska-mutil sahararren errealitatea ezagutzeko aukera ematen zaie familia getxoztarrei. Interesatuek informazio gehiago jaso dezakete Atfal elkartean (658 751 359 / atfalgetxo[abildua]gmail.com) edo Getxoko Udaleko Garapeneko Lankidetza Sailean (944 660 017 / lankidetza[abildua]getxo.net). Argazkian, aurreko batean gurera etorritako saharar umeetako batzuk udaletxean egindako harreran.
Haurrak udalerrian dauden bitartean, beraiekin begirale saharar bat eta bertoko beste bat izango dira. Atfal elkarteak astean behin familiek euren iritziak trukatzeko topaketak antolatuko ditu eta Getxo Kirolak elkarteko bazkide ez direnei txartel bana emango diete, harrerako hilabeteetan umeek kirol instalazioak erabili ahal izateko. Bestalde, urtero legez, Getxoko Udalak eta Atfal elkarteak Sahararen Aldeko Euskal Karabanarekin kolaboratuko dute. Ekimena Sahararekiko Koordinazio Unitateak, Fronte Polisarioak eta Euskal Fondoaren Sahararako Koordinazio Unitateak antolatu dute. Tokiko Udalak 18.000 euro eman ditu laguntza osagarri moduan. Programa horren helburua Saharako biztanleei elikagaiak helaraztea da, pairatzen duten elikadura-krisia ahal den neurrian arintzeko. Aurrekoetan bezala, honako hauek batu nahi dituzte: arroza, atuna oliotan, azukrea, pasta, sardinak oliotan, lekaleak eta produktu higienikoak (konpresak), besteak beste. Ekimen solidario horretan parte hartu nahi dutenek udalerriko ikastetxeetara eman ditzakete produktuak edo Atfal elkartearekin harremanetan jarri. Laguntza emateko epea ere ostiral honetan, maiatzak 20, amaituko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun