Astrabuduko Juanene plaza berriztatzeko proiektua "boto gosez" erabiltzea egotzi dio EAJri Erandioko PSE-EEk
Astrabuduko Juanene plaza berriztatzeko lanen berri udal hauteskundeetarako egun gutxi falta direla emateagatik, "boto gose lotsagarriaz" jokatzea leporatu dio EAJren Udal Gobernuari Erandioko PSE-EEk. Juan Otermin hautagai sozialistaren arabera, "lau urteren ostean, arrapaladan hartu dute erabakia, hauteskunde zundaketek boto mordoa galduko dituztela agerian utzi dutenean". Esleipen prozedura ere zalantzan jarri du PSE-EEren alkategaiak. Bere hitzetan, "proiektua behin betiko onartzeko epeak bete ezinak dira, kontuan hartuta korporazio berria ez dela abuztura arte abian izango". Erandioko Udalak iragarritakoaren arabera, udan hasiko dituzte Juanene plaza urbanizatzeko lanak. Bat-bateko aparkaleku bilakatutako esparrua oinezkoentzako gune egin nahi dute. Horri jarraiki, haurrentzako jolasak, eserlekuak, paperontziak, eta abar jarri nahi dituzte. Horretaz gain, zoladura, argiteria eta saneamendu zein ur-horniketa sareak berrituko dituzte. Argazkian, Otermin Pastorrekin batera, aurreko hauteskunde ekitaldi batean / © Bizkaiko PSE-EE.
Hamazortzi enpresek aurkeztu dituzte urbanizazio lan horiek egiteko proposamenak, eta Erandioko Udal Kontratazio Mahaiak lehen bilera bat egin du gai honen inguruan, aurkeztutako dokumentazio administratiboa aztertzeko, udal iturrien arabera. Ondoren, hilabeteko epearen barruan legeak agintzen duenez, Kontratazio Mahaia berriro bildu beharko da eta, eskaintza ekonomikoak aztertu ondoren, proiektua nori adjudikatu erabakiko du. Lizitazioaren aurrekontua 602.576 eurokoa da eta sei hilabeteko epea daukate lanak amaitzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun