Guztira 13 jabe lehiatuko dira beren idiekin txapelketak ematen duen sari nagusia lortzeko, hau da, 1.250 euro, Urdulizko Udalaren mantak eta Bizkaiko Foru Aldundiak emandako garaikurra. Bigarrenak, berriz, 1.100 euro eta garaikurra; eta hirugarrenak, 960 euro eta garaikurra. Dena den, diru sariak egongo dira laugarren postutik hamabigarreneraino.
Lehiatzaileak honela geratu dira banatuta: maiatzaren 20an, ostirala, Bakioko Mikel San Pelaio, Asteasuko Barriola eta Goierriko Juan Agustin. Bigarren egunean, Laukizko Landazabal, Errenteriako Intzinarte eta Birleko Mendipe. Igandeko atsedenaldiaren ondoren, txapelketak astelehenean, hilak 23, jarraituko du, Patxi Irarreta (Errenteria), Luberri (Birle) eta Oliden (Orio) uztarriekin. Azkenik, txapelketari amaiera emateko, beste lau uztarri arituko dira lehian maiatzaren 24an: Bakioko Juan Luis Biritxinaga, Mungiako Ecomet, Lasarteko Telleria eta Goierriko Construcciones Ugarte.
Proba hauek puntuagarriak dira Bilbao Bizkaia Kutxa, El Corte Ingles, eta Mungialdeko Udal Elkartea Challengesarako. Aipatu txapelketa Herri Kirolen Bizkaiko Federazioaren kontrolpean jokatzen denez, epaileen erabakiak apelaezinak izango direla jakinarazi dute antolatzaileek.
Beste urte batez, Iparraldeko Idi Proba Txapelketa egingo dute Urdulizen etzitik, ostirala, asteartera arte. 18. edizio honetan, probak arratsaldeko 9etatik aurrera izango dira udalerriko Iparraldeko probalekuan. Hala ere, jokoaren gorabeherak direla eta, tokiko proba-harria apurtuko balitz, Berangoko probalekuan jarraituko luketela jakinarazi dute arduradunek. Idien pisatzea proba bakoitzaren egunean egingo dute, goizeko 10etan. Joan den hilaren 8an izan zen idi-pare parte-hartzaileen inskripzioa eta, era berean, bakoitzak zein egunetan parte hartuko duen zehazteko zozketa ere egin zuten. Gauzak horrela, jardunaldi bakoitzean hiru uztarri lehiatuko dira, azkenengoan izan ezik, lau hartuko baitute parte. Argazkian, idi probak Urdulizko probalekuan / © Urdulizko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun