Zabaldu berri dituzten hiru igogailuek FEKOOR Minusbaliotasun Fisikoa duten Pertsonen Bizkaiko Koordinadoraren oniritzia daukate, udal iturriek diotenez. Gainera, inguruko auzokideen, seme-alaba txikiak dituzten familien eta, bereziki, mugitzeko arazoak dituztenen zerbitzura dago. Igogailuek 28 metroko altuera gainditzen dute, 10 solairu dituen etxe baten parekoa. Lehenengoak, Arene eta Euskal Herria kaleak lotzen dituenak, 12,5 metroko altuera gainditzen du; bigarrenak, Euskal Herria eta J.B. Uribarri kaleak lotzen dituenak, 9 metro; eta hirugarrenak, J.B. Uribarri eta Alango kaleak lotzen dituenak, 7 metro. Igogailuak panoramikoak dira, hormigoi zuriko akabera aurrefabrikatuekin eta led bidezko argiztapen dinamikoarekin. Azken horiek, kolorez aldatzen dira gauez. Horretaz gain, urrutiko kontrola eta Udaltzaingoarekin lotuta dauden bideo-zaintza sistemak ditu. Igogailuak goizeko 7etatik gaueko 11etara egongo dira erabilgarri egunero. Aldi berean, horien ondoan, oinezkoentzako hiru eskailera jarri dituzte.
Algortako beheko eta goiko aldea lotzen dituzten hiru igogailuen bideoa (© Getxoko Udala):
Algortako Arene, Euskal Herria eta Alango kaleak lotzen dituzten hiru igogailuak martxan jarri zituen joan den ostiralean Getxoko Udalak. “Getxon, garraio jasangarriaren irizpidea aintzat hartuta, oztopo arkitektonikoak kendu eta mugikortasuna hobetzeko jarduera berri bat da”, adierazi zuen Imanol Landa alkateak. Aipatu igogailuek ez dute kutsadurarik sortzen eta, horiek egiteko, 1,5 milioi euro inguru gastatu ditu Udalak. Doako zerbitzua da eta 16 pertsona hartzeko tokia dute. Horrela, Algortako behe aldean bizi diren 7.000 bizilagunak Alango aldeko osasun etxera iristea erraztuko dute. Gainera, udaletxera, Justizia Jauregia eta Ogasun Sailaren bulegora ere heltzeko aukera ematen dute igogailuek. "Getxoko herritar guztiok errez mugitzearen aldeko apustuan, Alangoko igogailuak lehen mailako jarduera izan dira. Izan ere, horiek mesede handia egingo diete auzokide askori, besteak beste, anbulatoriora, udaletxera, Ogasun bulegora eta haur-eskolara joateko", zehaztu zuen alkateak. Argazkian, zabaldu berri dituzten igogailuetako bat / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun