"Getxo gertu" izeneko herritarrentzako lehenengo bi informazio guneak jarri ditu Algortako Telletxe eta Borobia plazetan tokiko Udalak. Guztira, udalerri osoan zehar, era horretako 10 toki jartzea aurreikusi dute. Bihar, ostegunarekin, hirugarrena jarriko dute Bizkaiko Zubiaren ondoan, Areetan. Dispositibo horietako bakoitzak 46 hazbeteko bi pantaila ditu: bata, informazioa kontsultatzeko ukipen-pantaila da; eta bestea, jarraian hainbat eduki aurkeztekoa: albisteak, eguraldiaren iragarpena eta oharrak, esate baterako. Imanol Landa Getxoko alkateak adierazi duenez, "informazio gune hauen helburua udalerriko merkatari eta enpresa jardueraren dinamizaziorako tresna izatea da". Argazkian, Algortako Telletxe plazan dagoen dispositiboa / © Getxoko Udala.
"Getxo gertu" zerbitzuak hainbat komertzioren, ostalaritza establezimenduren edo udal zerbitzuren kokapena kontsultatzeko aukera eskaintzen du, horien jardueraren edo izenaren araberako bilaketa eginez. Kontsultak egiten dituztenek aukeratutako tokiari buruzko informazioa ere jasotzeko aukera izango dute, posta elektroniko bidez edo azken garaiko mugikorretarako mezu bidez. Gauzak horrela, komertzioari buruzko oinarrizko datuak jasoko dituzte, baita establezimendura joateko ibilbidearen deskribapena ere. Getxoko Udalak tokiko merkatariei eta ostalariei beraien negozioari buruzko informazioa zerbitzuaren datu basean sartzeko aukera eskainiko die. Horrela, "sistemaren parte izateaz gain, ukipenezkoa ez den pantailan aurkezpen dinamiko batzuen bidez publizitate moduan iragartzeko aukera izango dute", jakinarazi dute arduradunek. Aurrerantzean beste zazpi dispositibo jarriko dituzte udalerriko hainbat tokitan: Algortako Tellagorri plazan; Areetako Eskoletako eta Xake plazetan; Itzubaltzeta / Romoko Santa Eugenia plazan; Andra Mariko kiroldegian; Kirol Portuan eta Turismo Bulegoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun