Leioako Udalak lankidetza hitzarmena sinatu du Emaus kooperatibarekin, alokairuzko bizikleten sistema berria ezartzeko. Gauzak horrela, leioaztarrek urte osoan zehar erabili ahal izango dituzte horiek. Urteko tasa 10 eurokoa izango da. Hala ere, udalerrian erroldatuta ez daudenek 20 euro ordaindu beharko dute. Ekimen horrekin, "Udalak ingurumenaren babesaren aldeko apustua mantentzen du eta jasangarritasuna sustatzen dituzten ekintzak bultzatzen ditu", adierazi dute tokiko arduradunek. Zerbitzu berri horrekin, bidegorrien sareari bultzada eman eta bertan lan egingo duten pertsonen gizarteratzearen alde egingo dute. Izan ere, Leioako Udal Gizarte Zerbitzuak eta Enplegu Sailak elkarrrekin hautatuko dituzte zerbitzu horretan lan egingo duten herritarrak, "beti ere gizarteratze eta laneratzeko arazoak dituztenak", aipatu dutenez. Alokairuzko bizikleta zerbitzua martxan egongo da urteko 365 egunetan, 24 orduz. Argazkian, Leioako txirrinduak alokatzeko zerbitzua Getxokoarekin bateragarria izango da.
Alokairuzko zerbitzu hori Getxokoarekin bateragarria izango da, hau da, Getxoko bizikleta bat Leioan utz daiteke eta alderantziz, "herri bietako bidegorrien bitartezko lotura jasangarria sustatzeko", adierazi dute arduradunek. Guztira, alokairuzko 60 txirrindu izango dira Leioako kaleetan, denak identifikatzeko oso errazak. Lau alokairu puntu egongo dira herritik banatuta informazio puntu batekin, erabiltzaileek dituzten zalantza guztiak argitzeko. Horretaz gain, bizikleta bakoitzak giltzarrapo bat izango du automatikoki bizikletaren kontrola eramateko. Horrekin, erabiltzailearen beharrezko informazioa hartu eta erabiltzeko prest utziko du. Horren ostean, bizikleta momentu oro kontrolatuta egongo da GPS sistema bati esker. Informazio puntuetan, ukitzeko pantailak izango dituzte. Horien bitartez, txirrinduaren erreserba egin eta erabiltzaileak bere kezkak zein zalantzak argitu ahal izango ditu. Horiek herriko lau tokitan egongo dira: Artatza auzoan, Amaia Etorbidean, Leioako metro geltokian eta Sakoneta kiroldegian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun