Bitartean, hauteskunde kanpainaren azken egunerako ekitaldi berezia antolatu du Getxoko Bilduk. Arratsaldeko zazpietatik aurrera, musika, txistorra eta sagardoa, triki poteoa, bertsolariak... eta sorpresa gehiago izango dira, Santa Eugenia plazan hasita. Baina, Uribe Koska eta Erandioko beste herri batzuetan egongo da zer ikusi. Gorlizen ere jai giroan egingo dute kanpaina bukaera, batzeko ordua 19:00etan Iberre plazan jarrita. Azkenik, Erandion, hauteskunde bukaerako mitina egingo dute bihar, 20:00etatik aurrera, Jado kalean.
Bidezabalen egindako ekitaldi politikoa:
Tele Bilbao eta Canal Bizkaia kateek "baztertu" egin dutela salatu du Getxoko Bilduk
Tele Bilbao katean atzo bazkalostean izandako hauteskunde-eztabaidan, Getxo udalerrian aurkeztutako hamar taldeetatik lau baino ez (EAJ, PP, PSE-EE eta Ezker Batua) zeudela jakinarazi du gaur Bildu koalizioak. Antzeko zerbait gertatu zen Canal Bizkaian: "bertoko ikusleei ere ukatu zitzaien Getxon hautagaitza aurkezten duten alderdi guztien proposamenak entzuteko aukera", kritikatu dutenez. Hautagaitza batzuk aukeratu eta beste batzuk baztertzeko irizpidea zein izan den "ulertzen ez duela" adierazi du Getxoko Bilduk. "Esaterako, eztabaida horretako gonbidatuen artean, ez zegoen gaur egun Udalean ordezkaritza duen Alternatiba alderdia, koalizioaren partaidea den", azaldu dute tokiko ordezkariek. Hori guztia ikusita, eta inkestek azaltzen duten boto-tendentzia kontuan hartuta, "taldearen bazterketa informazio plurala jasotzeko ikus-entzuleek duten eskubidearen kontrakoa dela" uste du Getxoko Bilduk. Argazkian, "Andra Mari eta Azkorri defendatuko dituela" adierazi zuen Getxoko Bilduk larunbatean Bidezabalen egindako ekitaldi politikoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun