Getxorako alkategai euskaldunen arteko eztabaida sarean jarri du Koska irratiak

Koska irratiak herenegun burutu zuen Imanol Landa (EAJ), Maitane Nerekan (Bildu) eta Amaia Aparicio (EB) Getxo Udalerako alkategai euskaldunen arteko eztabaida. Nahikari Ayo Aralarreko ordezkariak, baina, ezin izan zuen parte hartu saioan agenda arazoak zirela eta. Gauzak horrela, ordu beteko saioan, besteak beste, honako gaiak izan zituzten aipagai hiru politikariek: enplegua, etxebizitza, gizarte arloa, hiri antolamendua, Gobela ibaiko uholdeak, aparkalekuak, zaborrak, hezkuntza, parekidetasuna, hizkuntz normalizazioa, parte hartzea eta eskubide zibil eta politikoak. Saioa bukatzear zegoela, Algorta erdian izandako itzalaldi batek argindarrik gabe utzi zuen irratia, emisioa mozten. Halere, irratiko kideek bideoa eta audioa berreskuratzerik izan zuten.