Getxoko Udaltzaingoak 17 txakurren jabe salatu ditu arauak hautsi dituztelakoan
Getxoko Udaltzaingoak 17 salaketa jarri ditu apirilaren 13tik, txakurren jabeen artean gizabidezkoak ez diren portaerak geldiarazteko jarduerak areagotu zituenetik. "Batez ere, animaliak edukitzeko ordenantza arautzailea betearaztea" dute helburu ekinbideek, udal iturriek diotenez. Josu Loroño Komunikazio zinegotziak adierazi duenez, "hilabetean gertatutako 17 arau-haustetik, gehienak txakurrak lotu barik eramateagatik izan dira. Gorozkiei dagokienez, lorategi eta berdeguneak kontrolatzen dituen Cespa enpresak jakinarazi digutenez, lekurik problematikoenak Neguriko Atxekolandeta eta Portuko pasealekuak dira". Indarrean dagoen araudiaren arabera, gorozkiak ez batzeak 601 euro arteko isunak aurreikusten ditu eta, txakurrak lotu gabe eramateak 300 eta 1.500 euro artekoak. Argazkian, hainbat txakur hondartzan jolasten / © Sopelako Txakurren Lagunak.
Udaltzaingoak aipatu kanpainan zehar zaindutako aldeak honakoak izan dira: Santa Ana, Moilako pasealekua eta Zugatzarte, Areetan; Txabarri Zuazo eta Errekagane, Itzubaltzeta / Romon; eta Algortako etorbidea, Maria Cristina, Aldapa eta Ormaza parkeak, Algortan. Kontrolak 8:00etatik 11:00ak arte; 14:30etik 17:00etara; eta 18:00etatik 21:30era egin zituzten. Ordenantzak bost eremu ezartzen ditu udalerriko hainbat tokitan, udako eta neguko ordutegiarekin, txakurrak lotu gabe ibil daitezen, beti ere beren jabeen zaintzapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun