Folixa Asturiana izango da larunbatean Itzubaltzetan

Larunbat honetan, maiatzak 28, sei urte beteko ditu Itzubaltzeta / Romoko Itzubaltzeta gaztetxean antolatzen den Folixa Asturianak edo jai asturiarra. Ikuspegi internazionalista batetik eta elkar ezagutza helburu, 2005ean martxan jarritako festibala urtero hartu du Itzubaltzeta / Romo herriak, Asturiaseko hizkuntza, musika, gastronomia eta kultura oro har ezagutzeko prest. Era berean, bertatik etorritako lagunei Euskal Herriko ohiturak, hizkuntza eta kultura erakutsi zaizkie ere, nahiz eta izenak dioen legez, eguneko protagonista Asturias izan. Jaialdi asturiarra Asturiasetik etorritako taldeei ongi etorria emanez abiatuko da. Herri bazkariaren bidez izango da hori 15:00etan, gaztetxean. Txartelak gaztetxean bertan hartu ahal izango dira 5 euroren truke. 18:00etan, Villaviciosako gaiteroen kalejira egingo dute Itzubaltzeta / Romon zehar gaztetxeraino. Bertan, Asturiaseko sagardo dastaketa izango da, kontzertuetarako beroketa gisa. Kontzertua 20:30ean hasiko da, asturieraz abesten duten Skama La Rede, I.R.A. eta Galan taldeekin. Sarrerak lau euro balio du.