Maiatza eta ekainerako deitutako hiru lanuzte egunetatik lehenengoa egin zuten atzo, asteazkenean, Metro Bilbao garraio enpresako langileek. Lanuzteak goizeko 6:30etik 8:30ak arte eta, arratsaldez, 18:30etatik 20:30ak arte egin zituzten. LAB sindikatuak jakinarazi duenez, goizeko geldialdiak "erabateko jarraipena" izan zuen. Trenen gidarien artean segimendua %93a izan zen eta geltokien beharginen artean %90ekoa, Bilbokoetan izan ezik. Basarrate eta San Inazio arteko geltokiak "ia-ia paralizatuta" egon zirelako, %98ko jarraipenarekin, LABen aburuz. Metro Bilbaok egindako irakurketa bestelakoa izan da. Izan ere, garraio enpresak zabaldutakoaren arabera, langileen herenak soilik jarraitu zuen protesta, %32,98, hain zuzen. Bestalde, enpresaren arduradunek zerbitzu minimoa %67,68koa izan dela gogoratu dute, nahiz eta aurreko egunetan %40a izango zela esan. Hori dela eta, sindikalistek Metro Bilbaok zenbaki horiek lortzeko egindako "tranpak" salatu dituzte. Argazkian, hilaren 18an, garraio enpresako bulego nagusiaren aurrean elkartu ziren ehun langile inguru / © LAB Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun