Ekainaren 27a eta uztailaren 29a bitartean, 7 udaleku izango dira Itzubaltzeta / Romon eta Algortan. Horietan umeek arazorik gabe goza dezatela ziurtatzeko, haurrek "euskaraz ondo egiteko" kapazak izan behar direla gogoratu du euskara elkarteak. Dena den, azken urteko ildoari jarraikiz, euskarara hurbiltzeko, lagun euskaldunak egiteko eta integrazio ildotik hasteko aukera emango zaie "euskaraz komunikatu ezin diren" 33 umeei, ingurune euskalduna eskainiz. Ume hauek, txanda guztietan banatuko dira, beti haur eta gaztetxoen %10 osatuz. Lehenengo txandan, 30 ume izango dira Algortako Aldai Patronatuan, ekainaren 27tik uztailaren 1era. Uztailaren bi hamabostaldietan, berriz, hiruna udaleku izango dira. Batetik, Romo ikastetxean 50na neska-mutil hamabostaldi bakoitzeko. Algortan, berriz, bina txanda egingo dituzte, adina kontuan hartuta: bata, 5 eta 7 urte bitarteko 50 haurrentzat, San Nikolas ikastolan; eta bestea 8tik 12 urtera arteko beste horrenbeste gazteentzat, Zabala ikastetxean.
Aurten merkeago
Beti bezala prezio ezberdinak egongo dira. Ekainaren 27tik uztailaren 1era arteko udalekuetan izena ematen duten bazkideek 45 euro ordaindu beharko dituzte; bazkide ez direnek 60 euro; eta Getxo udalerrian gutxieneko errenta jasotzen dutenek 20 euro. Uztailaren 5etik 15era zain hile horren 18tik 29era, 82 euro pagatu beharko dituzte bazkideek; 119 euro bazkide ez direnek; eta 20 euro Getxon gutxieneko errenta jasotzen dutenek.
Bapiruke aisialdi programa euskaldunean izena emateko aukera zabalik dago jada. Udaleku irekien bitartez, 5 eta 12 urte bitarteko 330 ume eta gaztetxoei jolasez, kirolez eta euskaraz beteriko uda pasatzeko aukera emango die Bizarra Lepoan Getxo udalerriko euskara elkarteak. Horrenbestez, bazkideek maiatzaren 31ra arte izango dute apuntatzeko aukera eta bazkide ez direnek ekainaren 2tik 7ra (biak barne). Horretarako, ondoko orduotan gerturatu beharko dira Algortako Martikoena kaleko 16. zenbakian (2. solairua) dagoen bulegora: astelehen, asteazken eta ostiraletan, 10:00etatik 13:30era; eta astearte zein ostegunetan, 17:00etatik 19:00etara. Ez da onartuko ordutegi horietatik kanpo entregatzen den orririk, Bizarra Lepoaneko arduradunek zehaztu dutenez. Halaber, izen ematea ezin izango da telefonoz, postaz edo faxez egin. Diru sarreraren ziurtagiriarekin (E.K. 3035 0108 06 1081032766) eta Osakidetzaren txartelaren fotokopiarekin batera bulegora hurbildu eta bertan izen-emate orria eta irudi eskubideen orria bete beharko dira. Argazkian, Bapirukeko umeak magia saio batean adi-adi.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun