Uribe Kosta eta Erandion kontzertu sorta oparoa izateaz gain, asteburu honetan gure mugetatik kanpo ere arituko dira eskualdeko musikariak. Besteak beste, Eneko Burzako bakarlari algortarrak, Moby Dick izenpean ezagunagoa denak, Tolosako Auggie dendan urtean behin egiten duten emanaldian abestuko du gaur, ostirala, 19:00etatik aurrera. Sarrera eta garagardoa dohainik izango dira "dendak gainezka egiten ez duen bitartean", antolatzaileek adierazi dutenez. Bestalde, Leioako Kurkudi herriko tabernan, Los Calavera bikoak joko du, 22:00etatik aurrera. Bilbon sorturiko musika egitasmo horretako bi kideek punk rock musika jorratzen dute nagusiki, bateria eta gitarra batzen dituen formazio bitxi batean. Bitartean, Erandioko Sentinel aretoan, Guatorock ekimenaren aldeko kontzertua hasiko da 20:00etan. Bertan, Reborn eta Cleptokratics taldeak igoko dira oholtzara. Argazkian, Moby Dick bakarlaria Tolosan izango da gaur / cc-by-nc-sa Moby Dick Love.
Larunbatari dagokionez, Villapellejos taldeak kontzertua eskainiko du Erandioko Sentinel aretoan, 20:00etan. 2009an Bilbon sorturiko taldeak proto-punk bezala definitzen du bere musika joera. Itzubaltzeta gaztetxean, berriz, Skama La Rede, I.R.A. eta Galan taldeek joko dute, 20:30etik aurrera, Folixa Asturiana edo jai asturiarraren barruan. Sarrera 4 eurotan egongo da. Bestalde, Plentzia Astillero plazan Laurobak emango du kontzertua 22:00etan. Bitartean, Aitor Esteban itzubaltzetarrak jotzen duen Kherau folk akustiko taldea Meñakako herriko tabernan izango da 22:00etatik aurrera. Azkenik, Irun aldera joango dira Sirokakoak. Bertoko Elkartasun Gauean, Governors, Txapelpunk eta Rat-zinger taldeekin batera joko dute, 21:30etik aurrera, Landetxako frontoian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun