"Zirika zirkaos" kale antzerkia
Munduko zirkurik handiena dator herrira, etxe ondora, publiko guztiarentzat, erritmo izugarria eta umorez blai. Artistarik onenak ezagutuko ditugu bertan: Errusiatik Kasparof, labana-jaurtitzailea; Txinatik etorri berria den Sin txan pu, ekilibristen artean ekilibristena; Italiatik datozkigun Torpellinni anaia-arrebak, akrobaziak; Kubako malabaristarik onena, oihal-aerea, dantza…
"Aitona Matias" antzerkia
Maiaren aita ez da bere izenaz gogoratzen eta memoria galtzen ari da. Baina ilobak ez du etsitzen, eta oroitzapenetatik egindako bidaien bidez, laguntzeko zer egin dezakeen jakiten saiatuko da. Teatre Nu konpainia katalanak eskaintzen du, euskaraz.
"Zergatik ez?" tailerra
Euskararen erabilera sozialaren inguruan hausnartzeko saioa da. Hizkuntza erabiltzeko argudioak eskainiko dituzte eta aurrez aurreko elkarrizketetan hizkuntzari eusteko teknikak baino, hausnarketarako arrazoiak eta gakoak jorratu nahi dituzte. Topagunea euskara-elkarteen federazioko kideek emango dute. Funtsean galdera hau planteatzen dute: Zergatik ez kokatu euskara guztion elkargunerako, komunikaziorako hizkuntza gisa?
Egizu Getxo Euskaldun! elkarteak udalerriko familiak euskaraz jarduteko hainbat ekimen antolatu ditu datozen egunetarako. Gaur bertan, arratsaldeko 5:30etik 6:30era, "Zirika zirkaos" kale antzerkia izango da Areetako Eskoletako plazan. Igandean, hilak 29, Getxoko Kultur Etxeak antolatutako "Aitona Matias" antzerkia ikusteko aukera egongo da 18:00etan Areetako Andres Isasi Musika Eskolan, lau euroren truke. Asteartean, berriz, "Zergatik ez?" euskararen erabilera sozialari buruz hausnartzeko gurasoentzako tailerra egongo da Algortako Aldai Patronatuan, arratsaldeko 5:30etik aurrera. Azken ekimen hori doakoa izango da. Hala ere, gurasoen kopurua mugatua izango da, 15 pertsonetakoa, hain zuzen. Argazkian, "Aitona Matias" txotxongilo ikuskizunaren irudi bat / © Teatre Nu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun