Ia bost urte dira Itsasoruntz lehendabizikoz Algortako Portu Zaharrean agertu zenetik. 2006ko urriaren 21ean, euskal preso politikoen eskubideen alde "busti" ziren 300 bat surf zale. Erronka berriei helduz, eskubide zibil eta politiko guztien errespetua eta bermea aldarrikatu du ekimenak, baita giza eskubide indibidual eta kolektibo ororena ere. Itsasoruntzek dioenez, "herriak dauka hitza, herria da giltza. Har dezagun guztion artean gure bizitzako olaturik ederrena!". Itxaropena eta irribarreari eusteko asmoz, jai esparru bilakatu zen Portu Zaharra. Aitzol de Castrok gidatuta, Jone Uria, Arrate Illaro eta Jon Maia bertsolariak (mp3) izan ziren oholtza gainean jarritako txalupara igotzen lehendabizikoak, jendea txalaparta deiadarrari kasu eginez apurka-apurka batzen ari zela. Unai Elorriaga idazleak olerkia (mp3) irakurri baino lehen dantza eskaini zuten dozena bat neskatilek. Ondoren, hawaiiar dantzekin ere ausartu ziren txikiak. Dudarik gabe, uretara sartu aurretik, Porrotx pailazoak jaso zituen txalorik gehien. Magia jolasa eginez atera zuen euskal presoekiko elkartasun mezua. Zapatatzarrak kenduta, itsasora abiatu zen sudurgorria, kristalezko botilan sartuta "Maite zaituztegu!" irakur zitekeen gutuna apar artean murgiltzeko asmoz: helmuga Espainia eta Frantziako espetxeak.
Hartara, Porrotx izan zen uretara salto egiten lehenengoa, baita bustitzen ere. Taula gainean arraunean daukan trebezia erakutsi zuen pailazoak, uretan, itsasoan jarritako ikurrinari helduta amaitu zuen arte. Haren atzetik joan ziren, argibideak entzun ostean, dozenaka surfzale. Neskak batek ohol gainean agurra dantza eskaini ostean, tantaka abiatu ziren guztiak Itsasoruntzen logoa irudikatzeko asmoz. Irudia osatu ostean, beste hainbat dantza egin zituen aurreko emakumeak, oraingo honetan mutil batek lagunduta, bakoitza bere surf oholaren gainean. Orduan areagotu ziren txaloak eta algara; baita euskal preso politikoen aldeko oihuak ere. Behin uretatik irten eta arropaz aldatuta, lunchaz, musikaz, dantzez eta zozketez gozatzeko aukera izan zuten guztiek.
Itsasoruntzek zabaldutako adierazpena:
Eutsi olatuari!
Ia bost urte dira lehendabizikoz Algortako Portu Zaharrean batu ginenetik. Itxaropena piztuz, olatua harrotzea lortu genuen orduan. Euskal Herrian zabaldutako aukera berriaren aurrean, berriro ere olatuaren gandorrera igotzea erabaki dugu Uribe Kostako surflariok.
Prozesua atzeraezina egin gura badugu, guztiz beharrezkoa da herritarren parte hartze aktiboa. Gauzak horrela, "bustitzera" deitu gura ditugu herritar guztiak.
Gatazkaren konponbidean ez dira makalak ditugun erronkak:
- Elkarrizketa eta alde orotariko akordioa, Euskal Herri osoan eta euskal hiritar guztiontzat, bazterketarik gabe.
- Eskubide zibil eta politiko guztien errespetua eta bermea.
- Giza eskubide indibidual eta kolektibo guztien errespetua eta bermea.
Herriak dauka hitza, herria da giltza. Har dezagun guztion artean gure bizitzako olaturik ederrena!
Elkarrizketa eta akordioaren aldeko olatua Algortako Portu Zaharrean (cc-pd Itsasoruntz):
Gatazkaren konponbiderako "olatua hartzera" deitu ditu herritarrak Itsasoruntzek
Uribe Kostako surflariek egindako deialdiari erantzunez, dozenaka herritarrek irudikatu zuten larunbatean Itsasoruntz ekimenaren logoa, Algortako Portu Zaharreko uretan. Itsas bazterrean gizon-emakume ugari zain zituzten itxaropentsu surf ohola hartzea erabaki zutenek. Euskal Herrian zabaldutako aukera berriaren aurrean, berriro ere olatuaren gandorrera igotzea erabaki dute Itsasoruntzeko kideek. Hala ere, orain ia bost urte hartutako konpromisoa ez zuten ahaztu nahi izan bustitakoek. Euskal presoen etxeratzea ozen aldarrikatu zuten surflariek. Porrotx pailazoak ere elkartasun aldarria helarazi nahi izan zien espetxeetako barroteen atzean dauden lagunei: paddle gainean arraunean, berak eraman zuen itsas zabaleraino barruan "Maite zaituztegu!" mezua zeukan kristalezko botila. Itsasoruntzek adierazi duenez, "gatazkaren konponbiderako prozesua atzeraezina egin gura badugu, guztiz beharrezkoa da herritarren parte hartze aktiboa". Hartara, "bustitzera" deitu ditu gizon-emakume guztiak. Bide horretan, elkarrizketa eta alde orotariko akordioa "funtsezkotzat" jotzen ditu ekimenak: "Euskal Herri osoan eta euskal hiritar guztiontzat, bazterketarik gabe". Argazkian, Porrotx izan zen bustitzen lehena / cc-pd Itsasoruntz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun