Itzubaltzeta / Romori dagokionez, bertako jai batzordea eta koadrilak atzo batzartu ziren larunbateko VI Koadrila Egunaren lanak eta ardurak banatze aldera. Dena den, Sopelan baino lasaiago ibiliko dira bertan. Izan ere, eguna ez da eguerdira arte hasiko, txupina eta hamabietakoa direla medio. Ondoren trikipoteoa izango da herrian zehar. Arratsaldeko 3etan, ordea, pregoia irakurri eta herri bazkariaz gozatuko dute, 9 euroren truke aurretik erosiko dutenek eta dozena bat euro ordainduta azken unera arte itxarongo dutenek. Txartela oraindik hartu daiteke Pinuetako Texas tabernan zein Itzubaltzeta gaztetxean. Txartelarekin batera, ezusteko opari bat eta gauean edari bat emango dituzte.
Bazkal ostean, 17:30ak aldera, bilketa eta ohiko koadrilen argazkia aterako dute, jolasekin hasi baino lehen. 20:00etan, ordea, herriari bira emango diote Orkresta Nazionala elektrofanfarrearekin batera egindako kalejiran. Ostean jaialdia izango da gaztetxean, DJ Leche de Gorrion Zurdorekin.
Datorren larunbatean, ekainak 4, Koadrila Eguna ospatuko dute Sopelan eta Itzubaltzeta / Romon. Sopeloztarrek goizeko 10:30ean emango diote hasiera egunari, udaletxetik abiatuta, mendi martxa bat eginez. Ondoren, 13:30ean, pintxoak dastatzeko aukera izango dute Sekeko gaztetxean. Arratsaldeko 3ak aldera, berriz, ohiko herri bazkaria egingo dute udaletxe aurrean. Urtero bezala, horretarako txartelak aurretik erosi beharko dira 6 euroren truke, Sekeko gaztetxean edo Plaza Beltza kulturgunean. Behin tripak aseta, neska-mutilen arteko lehia osasuntsua pizteko, herriko koadrilen arteko jolasak egingo dituzte 16:30etik aurrera. Azkenik, egunari amaiera emateko, poteoa eta batukada egingo dute Sopelako kaleetatik barrena. Antolatzaileek jakinarazi dutenez, aipatu jarduera guztiak aurrera eramateko ezinbestekoa da protagonisten parte hartzea. Horregatik, gaur bertan egunari azken ukituak emateko asanblada egingo dute 20:00etan Sekeko gaztetxean. Argazkian, iazko Koadrilen Egunaren aurkezpena Sopelan / © Gazte Asanblada Sopeloztarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun