Ilusio handiarekin abiatu zuten UK tabernaren proiektua, baina, azken urteotan jabeek aurrera egitea zail ikusi dute: "gatza da bezeroari nahi duena ematea eta, gainera, egungo krisi ekonomikoak bete-betean jo gaitu", azaldu dutenez. Lokala gazteei begira zabaldu zuten, baina lonjen aferak gorabehera ugari ekarri dizkie: "gazteek daukaten dirua ez da asko eta, lonja ordaintzen badute, bertan gelditzen dira berandura arte. Azken urteetan nabaritu izan dugu berandu etortzen zirela bezeroak. Jendea ordu txikietan etortzen zen eta, bakarrik hirurak arte zabaldu ahal genuenez, bi orduz lan eginez gatza da negozioa mantentzea", aitortu dutenez. Bestalde, traba ugari izan dituzte bost urte hauetan: "Udalak jarritako multak, ordutegi murritzak...".
Aurten indarrean jarritako "tabakoaren legea" ere nabarmen igarri dute UK tabernako arduradunek: "kaltegarri suertatu zaigu. Jende pilo etortzen zen kafea hartu eta zigarroa erretzera soilik eta, legearekin, jendeak etortzeari utzi zion. Gainera, daukagun espaloiarekin ez da oso erosoa izaten kanpora irtetea zigarroa erretzera". "Hainbat faktore dira aurrera egiten utzi ez digutenak", diote arduradunek. Hala ere, arazoei aurpegia erakutsi eta hainbat ekimen antolatu dituzte urte hauetan zehar jendeari, tabernaz gain, "aisialdirako eremu" bat eskaintzeko. "Herriaren erakusleiho edo gune erreferente" izaten saiatu dira argazki erakusketak eta kontzertu akustikoak antolatuz, besteak beste.
Bost urtez herriko gazte ugariren topagune izan ostean, bere ateak itxi egin ditu betiko Algortako Mariandresena kaleko UK tabernak. Joan den larunbatean izan zen ostatuaren azken eguna eta, agur moduan, bertan egon ziren bezerorik fidelenak azkeneko tragoak hartzen. Hasiera batean taberna oso indartsu abiatu bazen ere, urteak pasa ahala oztopo ugari topatu izan dituzte Oihan eta "Piña" lokalaren arduradunek: "hala nola, egungo krisi ekonomikoa, lonja eta txokoen hazkundea udalerrian, tabakoaren legea eta Udalaren jarrera", aipatu dutenez. Horiek guztiek ez dute batere lagundu eremu horren biziraupena bermatzez. Aurrera egiteko hainbat saiakera egin arren, agur esateko aukerarik baino ez dute izan UKko arduradunek: "pena bat da, baina ezin dugu gehiago. Gazte giroa umezurtz geldituko da agian, baina beti gertatzen dira horrelakoak; eta aurrera egin behar da". Arazoak arazo eta zailtasunak zailtasun, "ahalik eta modu onenean" taberna aurrera eramaten saiatu dira jabe biek. "Ondo egon da iraun duen bitartean. Ezagutu dugun jendea eta sortu dugun giroa ez dugu ahaztuko", onartu dutenez. Argazkian, Algortako UK taberna / © UK taberna.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun