Instalazioak handitu arren, futbol zelaiari dagokion lursailaren espazioa ez da handituko, lanak harmailen azpiko 209,45 metro koadroko azaleran egingo baitira, dagoen hutsune bat aprobetxatuta. Izan ere, Udalak duela lau urte zelaia eraiki zuenean, kontuan izan zuen, beharbada, egunen batean handitze-lanak egin behar izango zirela, tokiko arduradunek azaldu dutenez. Orduan, tribunaren azpiko espazioa bi zati simetrikotan banatu zen. Zati horietako batean oraingo instalazioak daude, eta bertan dira, halaber, gaur egun futbol zelaiak dituen aldagela biak. Beste erdian, ekainean hasiko diren lanen emaitza gisa, Udalak lau aldagela gehiago jarriko ditu, eta 2011-2012 denboraldiaren hasierarako prest egongo omen dira, hau da, aurtengo irailerako.
Hainbat gune
Proiektuaren aurrekontua 210.000 eurokoa da (BEZa barne), eta, horren barruan, lau aldagela eta garbiketarako bi gune eraikiko dituzte. Bi bloketan banatuko dira, eta bakoitzak bi aldagela eta garbiketarako gune bat izango ditu. Azken hori erdian egongo da, aldagela bien artean, baina aldagelek ate bana izango dute gune horretara sartzeko. "Horrela, aldagelan talde bat dagoenean, bestetik itxita egongo da sarbidea, kontrako taldea beste blokeko aldagela batean egongo delako; eta, modu horretan, beste aldagela horretatik garbiketarako beste gunera sartuko direlako", zehaztu dutenez. Garbiketarako gune bakoitzak sei dutxa, bi komun eta konketa-multzo bat izango ditu. Instalazioen zabalkundea osatzeko, beste zenbait gune ere eraikiko dira: komunak, bilera-areto bat, epaile nagusiarentzako gela garbiketarako espazioarekin, epaileentzako beste gela bat, biltegi txiki bat eta garbitokia.
Urduliz Futbol Taldearen beharrizanetara egokitzeko asmoz, Iparralde futbol zelaiko instalazioak handitzeko erabakia hartu du tokiko Udalak. Besteak beste, aldagela berriak egingo dituzte hurrengo denboraldiari begira. Futbol zelaia da amaitu berri den legealdian, Juan Olea jelkidea alkate izanik, "martxan jarritako zerbitzurik aipagarrienetakoa", agintari urduliztarrek adierazi dutenez. "Orain, haren ondorengoak, Javier Bilbaok, instalazio horiek handituko ditu", gaineratu dutenez. "Horrek agerian uzten du nolako arrakasta izan duen ekipamenduak eta zenbat erabili izan den. Beraz, legealdi honetako lehenengo proiektua izango da", esan dute Udaletik. Egindako adierazpenei jarraiki, ziurtzat jotzen dute tokiko arduradunek Javier Bilbao alkate izango dela. Maiatzaren 22an EAJk irabazi zituen hauteskundeak Urdulizen. Hala ere, Bildu koalizioak jelkideek beste zinegotzi eskuratu zituen: bost, hain zuzen. PSE-EEk, berriz, eserleku bat lortu zuen. Argazkia: © Urdulizko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun