Saharar errefuxiatuen kanpamenduetan, Aljeriako Bucraa herrixkan kokatutako adinekoen egoitzaren erabiltzaileei zuzendutako zerbitzuak areagotuko ditu Berangoko Udalak. Bataz beste, 40 gizon-emakume gerturatzen dira egunero aipatu instalazioetara. Gauzak horrela, 12 pertsonentzako garraioa jarriko dute. Eusko Jaurlaritzaren Herrizaingo Sailak emandako furgonetak beraien etxeetatik zentrora eramango ditu erabiltzaileak. Gaixoren bat kontsultategi medikura garraiatzeko ere balioko du, udal berangoztarreko iturriek aipatu dutenez. Saharar errefuxiatuek beraiek iradokita finantzatu zuten 2010eko Aste Santuan ateak ireki zituen adinekoen egoitza. "Zerbitzua beharrezkoa da, kontuan hartuta, lanerako adinean dauden pertsona gehienek kanpamenduetatik kanpo aurkitzen dutela lana", adierazi dutenez. Zentroan otordu bat bermatu, kontrol mediku prebentiboa egin eta baino turkiarra ematen zaie erabiltzaileei. "Beraiek aukeratu zuten azken hori, nahiago duten higiene pertsonalerako modua delako", zehaztu dute Berangoko Udaletik. Erizain batek arteria-presioa neurtu eta azukre-maila kontrolatzen dio bakoitzari. Horrela, adinekoren batek osasun arazorik badauka kontsultategi medikura edo ospitalera eramaten dute. Laster, erabiltzaileen bizi kalitatea hobetzen ahaleginduko dira, aire girotu sistema jarriz. Kanpoaldean 50 gradutara heltzen dira termometroak bertan. Argazkia: © Berangoko Udala.
Abdul gaztea da adinekoen zentroaren zuzendaria. Hiru hilabetez egon zen Berangon trebatzen. "Erabiltzaileen errespetua irabazi du jada", diote udal iturriek. Gaur egun, sei langile daude bere aginduetara: 24 orduz instalazioak zaindu eta segurtasunaz arduratzen diren guardia bi, hiru sukaldari-garbitzaile eta erizain bat. Berangoko Udalak finantzatuta eraiki zuten adinekoen egoitza, aiton-amon sahararrek eskatutako zerbitzua baitzen, bertoko gazteek errefuxiatuen kanpamentuetatik kanpo aurkitzen dutelako lana eta ezin direlako haien zaintzaz arduratu. 2009ko Aste Santuan hasi ziren lanak eta urte bat beranduago inauguratu zituzten instalazioak, Saharako lehen ministroa, Aaiungo gobernadorea eta Bucraako alkatea bertan zirela, Anabel Landa Berangoko alkatearekin batera. Joan den hilabetean, Mohamed Abdelaziz SEAD Saharako Errepublika Arabiar Demokratikoko presidenteak berak bisitatu zuen zentroa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun