Gazteen artean euskara eta sormena sustatzeko topaketak egingo ditu Getxoko Udalak
Getxoko Udalak sormen topaketak antolatu ditu ekainaren 28 eta 29rako, udalerriko gazteei begira. Horietan, neska-mutilek sormena landuko dute etorkizunetako Izarren Distira galetan parte hartzeko. Ekimenaren helburua gazteen artean euskararen erabilera sustatzea da, beraiek gustuko dituzten jardueren bitartez, arduradunek adierazi dutenez. Topaketekin batera, hainbat jarduera egingo dituzte azarora bitartean. “Euskararen erabilera bultzatzearekin batera, gazteei beren zaletasunak eta irrikak agertzeko espazioa ere eskaini nahi diegu”, azaldu du Koldo Iturbe Euskara zinegotziak. Topaketak Urduñako aterpetxean egingo dituzte eta doakoak izango dira. Izena emateko epea ekainaren 14ra arte egongo da zabalik. Argibide gehiagorako 663 083 736 telefono zenbakira deitu edo info[abildua]izarrendistira.com helbide elektronikora bidal daiteke mezua. Argazkian, antzerkietan gorputza menperatzeko parada izango dute topaketetan parte hartzen duten gazteek / © Getxoko Antzerki Eskola.
Topaketak 12 eta 18 urte bitarteko neska-mutilei zuzenduta daude. Bertan, hainbat tailer edo ikastaro trinkotan parte hartu ahal izango dute, baita antzerki teknikak, bideogintza, musika, gorputz espresioa edo irudia landu ere. Bestalde, datorren irailerako kale ekintzaren bat antolatzeko aukera ere izango dute parte hartzaileek. Azkenik, topaketetan eta kale ekintzetan sortutako ikuskizun edo materialarekin erakustaldi bat prestatzeko asmoa du tokiko Udalak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun