Yoga, tai ji eta defentsa pertsonal saioak egingo dituzte Gobela eta Fadura kiroldegietan
Getxo Kirolak udal erakundeak bazkideentzako doako hiru ikastaro antolatu ditu hurrengo larunbatetarako: yoga familian, tai ji eta defentsa pertsonala. Lehenengo saioa ekainaren 11an izango da, 10:00etatik 11:30era, Itzubaltzeta / Romoko Gobela kiroldegiko kantxan. Saioa Antxon Elosua yoga irakasleak zuzenduko du. Bertan, ehun pertsonek parte hartu ahal izango dute, bikoteka. Horiek pertsona nagusi batez eta 14 urte baino gutxiagoko beste batez osatuta egon beharko dute. Hurrengo larunbatean, ekainak 18, tai ji saioa egingo dute toki berean, 10:30etik 12:00etara. Aste Santuan diziplina horren inguruko beste saio bat egin zuten eta, izandako arrakastaren ondorioz, plaza kopurua bikoiztu egin dute. Gauzak horrela, 15 urtetik gorako 50 lagunek parte hartu ahal izango dute saioan. Jarduera horietako batean interesa dutenek 944 308 070 edo 944 045 151 telefono zenbakira dei dezakete. Argazkian, David Bustamante "Zuku", gorriz, Sopelako Tai Ji Taldeko bere ikasleekin / © Sopelana.net.
Ikasturte-amaierako programazio berezi horren barruan, eta defentsa pertsonala ikasteko, Asier Elordui arte martzialetako irakasleak beste saio bat emango du Algortako Fadura kiroldegian, ekainaren 25ean, 10:00etatik 12:00etara. Horretan parte hartzen dutenek defentsa pertsonaleko oinarrizko nozioak ikasiko dituzte, mota ezberdineko balizko erasoei aurre egiteko. Saio horretan 14 urtetik gorako 30 pertsonek parte hartu ahal izango dute. Bestalde, ekainaren 25ean eta 26an, Fadura eta Gobelako igerilekuetan, familian egiten den uretako jarduera-programaren denboraldiko azken saioa izango da, hau da, erditze aurreko eta ondorengo igeriketa-eskolak; jaio berrientzako igeriketa; eta ur-jolasak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun