Gazte bat atxilotu dute Neguriko etxebizitza batean indarrez sartzen saiatzea egotzita

Ertzaintzak 18 urteko gizon bat atxilotu zuen atzo arratsaldean Negurin, etxebizitza batean indarrez sartzen ari zelakoan. Eusko Jaurlaritzaren Herrizaingo Sailak zabaldutakoaren arabera, 19:00ak aldera jaso zuen abistua polizia autonomikoak. Behin lorategira sartuta, ustezko gaizkilea etxeko ate nagusia kolpatzen ikusi omen zuten bertaratutako ertzainek. Momentu horretan, mutilak sarraila apurtzea lortu zuen, polizia iturriek diotenez. Herrizaingo Sailaren arabera, ertzainek hura menperatu behar izan zuten. Jarrera horren zergatia galdetzean, bere ohiko bizilekua zela erantzun omen zuen gazteak. Hala ere, poliziek gezurretan ari zela konfirmatu eta atxilo eraman zuten bizilekuan kalteak sortu eta indarrez sartzea egotzita.