Getxoko Udaltzaingoak bi lagun atxilotu ditu bide segurtasunaren aurkako delitua egotzita
Getxoko Udaltzaingoak bi lagun atxilotu ditu asteburu honetan bide segurtasunaren aurkako delitua egotzita, tokiko Udalak jakinarazi duenez. Horietako bati, gainera, beste delitu bat leporatu diote, ustez ausarkeriaz gidatzeagatik. Guztira, 44 alkoholemia proba egin eta 10 positibo jaso zituzten poliziek. Horietatik bederatzi gidariei salaketa jarri zieten, arau-hauste administratiboa egotzita. Horietako batzuk udalerrian izandako bost trafiko istriputan nahastuta egon ziren, udal iturriek aipatu dutenez. Ezbehar horietako lautan, bi gurpildun ibilgailuek autoen aurka talka egin zuten. Bosgarrenean, berriz, autoa bidetik irten eta zuhaitz baten aurka jo zuen. Istripu horien eraginez, kalte materialez gain, pertsona bat zaurituta suertatu zen. Gauzak horrela, anbulantziak Gurutzetako ospitalera eraman behar izan zuen. Halaber, istripuetako batean nahastuta egon zen gidari bat atxilotu behar izan zuten udaltzainek, bide segurtasunaren aurkako delitua, gida-baimenik ez izatea eta ausardiaz gidatzea egotzita.
Udaltzaingoak emandako bertsioaren arabera, atxilotutako gazteak, Getxoko Andra Mari kaletik zihoala, bere autoa ziklomotor baten parean jarri zuen. "Dirudienez, txarto neurtutako txantxa zena egiterakoan, alboz jotzeko keinua egin eta ziklomotorra erortzea eragin zuen", adierazi dute aipatu iturriek. Dena den, lurrera eroritako neska gazteak ez zuen zauri larririk jasan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun