EAJk PSE-EEren laguntzaz alkatetza eskuratzen badu, oposiziotik lana eta jarraipen zehatza egiteko deia egin zuen ostiraleko batzar irekian Bilduk. Bildutako auzokideen iritziz, bertan aurkeztu zuten proposamena oso egokia izango da jelkideek dekantazioa egin dezaten. Plazan batu zirenen iritziz, "EAJk argi utzi behar du Bilduren gehiengoa errespetatzeko prest dagoela eta herritarrek nahi duten aldaketa errespetatzeko eta gauzatzen laguntzeko prest dagoen ala ez", Sopela.net agerkariak zabaldu duenez. Datozen egunetan egongo diren mugimenduen inguruan adi egoteko deia egin zuten koaliziokoek eta larunbatean, ekainak 11, izango den osoko bilkurara joateko lotu ziren.
Negoziaezinak diren gaiak:
Ondoko edukiak bete barik oposizioan aritzeko prest daudela azaldu zuten Bildu koaliziokoek. Honako hauek "negoziaezinak" dira:
- Eraikuntza mailari dagokionez, luzamendu bat indarrean jartzea, etxebizitzaren inguruko eztabaida herritarra garatzeko eta erreferenduma baten bitartez honen inguruko erabaki loteslea hartzeko.
- Sopelak egin beharko duen HAPO berria herriaren partaidetzarekin egin dadila eta azkenik erreferendum baten bitartez onartuta izan dadila.
- Kostaldea zaintzeko eta bere inguruan eraikuntzarik ez onartzeko konpromiso sendoa.
- Udal Aurrekontua egiteko herritarren parte hartze efektiboa bermatzea.
- Sopeloztarren parte hartzea bermatzeko sare eraginkorrak eta benetakoak antolatzea.
- Udal liberatuen soldaten irizpideak aztertzea eta orain arte indarrean dauden soldata altuak jaistea.
- Udalaren egungo egoera ekonomikoaren inguruko auditoria bat burutzea.
- Sopelako gazteriarekin batera lokal autogestionatu bat sortzea.
- Pribatizatutako zerbitzuen berrazterketa eta apurka apurka kudeaketa publkora itzultzea.
- Enplegu duina eta eskubideduna sortzeko konpromisoa.
Puntu horiekin batera, "Euskal Herrian abian den prozesu politikoarekin bat egiteko borondatea eta herritarren hitza eta erabakia bermatuta eta errespetatuta izan dadin", Sopelatik ere bat egiteko eskaera luzatu dute. Horretaz gain, Udalbiltzarekin bat egiteko eta preso politikoen aurka indarrean dagoen politika eta dispertsioa deuseztatzeko konpromisoa agertzen da.
Sopelan aldaketaren aldeko udal gobernu partekatua osatzea proposatuko dio EAJri Bilduk
Sopelako Bilduk bere lehenengo batzar irekia egin zuen ostiral arratsaldean udaletxeko plazan; baita "arrakastatsutzat" jo ere, Sopela.net agerkari digitalak zabaldutakoaren arabera. Azken udal hauteskundetan lortutako emaitzei errepasoa egin eta gero, balorazio arina egin zuten koalizioak lortutako zazpi zinegotziek, batutako 300 auzokide ingururen aurrean. Horretaz gain, azken egun hauetan egindako kontaktuen berri eman zuten: Ezker Batua, Aralar eta Berdeak alderdiekin egon direla azaldu eta hiru indar horiek lortutako 700 botoak "aldaketaren aldekoak" direla adierazi zuten, Sopela.net-ek argitu duenez. Aipatu hiru indar politikoek alkatetzari eta aldaketari buruzko adierazpen bateratua lantzen ari direla informatu zuten. Batzar irekian alderdi horien ordezkariak ere egon ziren. Hori esanda, alkatetzarako hautagai Saioa Villanuevak azaldu zuenez, Sopelako Bilduk EAJri "mezu argi eta sendoa" helaraziko dio, "aldaketaren alde egin dezan": norabide horretan konpromisoak har ditzan eta, horrela eginez gero, "aldaketaren aldeko gobernu partekatua" osatzea proposatuko diete jelkideei. Horren lidergoa Bilduk edukiko luke eta "herritarren parte hartzean oinarrituta" egongo litzateke. Bide horretan, bere hautagaia ez aurkezteko eskatuko diote EAJri. Argazkian, ostiraleko batzar irekia / © Sopela.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun