Andra Mari jaiak iragarriko dituen kartela hautatzeko lehiaketa antolatu dute beste urte batez Urdulizen. Lanak postaz zein zuzenean entregatu ahal izango dira tokiko kultur etxean (Aita Gotzon, 16 - 48610 Urduliz), ekainaren 21eko 13:30ak arte. Irabazleak 400 euro jasoko ditu. Bestalde, ekainaren 22tik uztailaren 7ra bitartean egingo den erakusketan herritarrek aukeratzen duten lanaren egileak 100 eurotako saria lortuko du. Eta beste saririk jaso ez duen urduliztar baten obrarik onenaren egileak, beste horrenbeste. Uztailaren 8an emango dute ezagutzera epaimahaiaren erabakia. Argazkian, goitibehera jaitsiera Urdulizko Andra Mari jaietan / cc-by-nc-sa Napharroa.
Horrenbestez, nahi duten lagun guztiek parte hartu ahal izango dute lehiaketan, eta aurkeztu beharreko lanen kopurua librea izango da; baita kartelaren gaia eta erabili ahal diren teknika eta kolorea ere. Neurria, 45 x 60 zentimetrotakoa eta euskarri gogorrean itsatsia derrigorrez. Ordenagailuz eginez gero, kartelaren euskarri informatikoa eman egin beharko da. Agertu behar den testua hauxe da: "Urdulizko Jaiak - Andra Mari 2011". Kartelak egilearen sinadura barik aurkeztuko dira; kartazal itxi batean sartuko dira egilearen datuak: izen-abizenak, adina, helbidea eta telefono zenbakia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun