Bestalde, Plentzian, EAJk alkatetza lor lezake, Bilduren botoak bereganatuta. Argi dagoena da ez dela EAJ eta Isamari Zarauzaren independenteen arteko gobernu bateratua egongo. Barrikan eta Gorlizen independenteek izango dute giltza. Urdulizen, ordea, PSE-EEk erabakiko du Bilduk ala, litekeena, EAJk alkatetza izango duten. Ezustekorik ezean beste udalerrietan EAJ nagusitu beharko litzateke.
EAJren EBBren oharra
Euzkadi Buru Batzarrak hartu duen erabakiaren arabera, bere hautagaitzak aurkeztuko ditu ordezkaritza lortu duen udal guztietako alkatetzetara, eta bere zerrenda buruak bozkatuko ditu ekainaren 11an euskal udalak osatzeko ospatuko diren Osoko Bilkuretan.
Erabaki honen bidez ere, hiru ahaldun nagusietarako bere hautagaiak aurkeztuko ditu, EAJ-PNVren egitasmoa beste hautagaienarekin alderatzeko xedez. Zentzu honetan eta hemendik hiru Batzar Nagusiak osatzeko Osoko Bilkurak izan arteko epean, une honetan aurreikusten ez diren inguruabarrik ez badago, EAJ-PNVren batzarkideek beren zerrenda-buruak baino ez dituzte babestuko.
Datorren larunbatean, hilak 11, pasa den maiatzaren 22ko hauteskundeetatik irtendako Hego Euskal Herriko udalbatzak eratu eta alkateak aukeratuko dituzte. Bozketa horietan, gaur EAJk jakinarazi duenez, alderdi jeltzaleak bere alkategaiak aurkeztu eta bozkatuko ditu. Gauzak horrela, Sopelan Josu Landaluze jelkideak lor lezake alkatetza, PSE-EEren babesa jasoz gero. Jose Antonio Pastor PSE-EEko bozeramaileak foru aldundietan eta hiriburuetan EAJri botoak ez dizkiotela oparituko argi utzi zuen aurrekoan, baina ez dago argi erabaki hori herri txikietara ere eramango duten ala Bilduri bidea mozteko iritziz aldatuko duten. PPren botoa ziurtatuta dauka EAJk, egunotan Basagoitik behin eta berriro errepikatu duenez, baina ez litzateke nahikoa Landaluze alkate bihurtzeko. Aurrekoan, Bilduk bion arteko udal gobernua eskaini zion EAJri, baina alderdiak ez du aintzat hartu. Argazkian, Josu Landaluze, eskuman, Imanol Garai jarduneko alkatearekin iazko Gabonetan / © Joseba Zubiaur - Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun