Espainiako Auzitegi Gorenak absolbitu egin ditu Amets Ladislao, Ibai Egurrola eta Marimertxe Alcocer algortarrak zein Xabier Gutierrez leioaztarra, Uribe Kostako Amnistiaren Aldeko Mugimenduak aurretatu duenez. Auzitegi Nazionalak zazpi eta bost urteko espetxe zigorrak ezarri zizkien, Asier Borrero eta Aitor Artetxe ustezko etakide algortarrak ezkutatu eta ihes egiten lagundu izana leporatuta. Beste akusatu bat, Maribel Prieto berangoztarra absolbitu egin zuen. Auzitegi Gorenak maiatzaren 19an ikusi zuen auzia, Europa Press albiste agentzia espainolak zabaldu bezala, eta absoluzioaren berri gaur jakin dute akusatuek. Egurrola, Ladislao eta Gutierrez Irunen atxilotu zituen Guardia Zibilak 2008ko abenduaren 8an; eta Alcocer eta Prieto abenduaren 10ean atxilotu zituzten Itzubaltzeta / Romon eta Berangon, hurrenez hurren. Guztiek salatu zuten guardia zibilek "modu basatian torturatu" zituztela. Argazkian, auziperatuei babesa emateko agerraldia.
Marimertxe Alcocerrek Euskal Preso Politikoen Kolektiboa utzi eta bere aldetik jotzea erabaki zuen espetxean zegoenean, bere garaian AAMk aipatu zuenez. Hartara, jasandako torturak bere aldetik salatu zituen jendaurrean, Iñaki Zarraoa Getxoko alkate ohia eta Martxelo Otamendirekin batera egindako agerraldian. Salaketa hori ikertzeko agindu zuen Madrilgo auzitegiak. Auzipetutako guztiak espetxean izan ziren prebentibo gisa. Prieto 2009ko martxoan irten zen kalera; Ladislao, Egurrola eta Gutierrez apirilean irten ziren; eta Alcocer maiatzean. Orain kalean ziren denak, Gorenaren epaiaren zain.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun