Kontratazioak "apetaren arabera egiteagatik" salatu du Barrikako alkatea Bilduk
Juan Jose Ezpeleta Barrikako jarduneko alkatearen kontrako salaketa aurkeztu zuten atzo Bilduko zinegotziek, Getxoko Instrukzioko 6. epaitegian. EAJ utzi ostean iBarrika alderdiaren burua denari, "apetaren arabera, aurrekonturik gabe obrak kontratatzea" leporatzen diote koalizioko ordezkariek, "El Correo Español" egunkariak zabaldu duenez. Barrikako Bilduren arabera, horretarako "eskumenik ez zeukala", 19.392 eurotan agindu zituen lanak Ezpeletak eta maiatzean egin zituzten: bata, Bustu aldean argiteria publikoa jartzekoa, 12.569 eurotan; eta bestea, Lastarrin saneamendu hartunea ipintzekoa, 6.822 eurotan. Aipatu jarduna "prebarikazio edo kontratazio iruzur delitua" izan daiteke, koalizioaren ustez, "obrak aurrekonturik ez zeukatelako eta horretarako krediturik ez zegoelako". Argazkian, Juan Jose Ezpeleta Barrikako alkatea.
Bilduk azpimarratu duenez, lanak "legeztatzen" ahalegindu zen Ezpeleta, aurrekontu aldaketa saiatuz. Hala ere, Udalbatzak atzera bota zuen proposamena urtarrilaren 12an. Koalizioak iragarri du Udalbatza berria osatuta EAEko Kontu Auzitegiara joko duela, kontu-ikuskapena eske.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun