Udalbatzaren azken saioaren aktaren sinadurarekin eta tokiko zinegotziei zein lau urte hauetan hil diren ordezkari politikoen senideei Aixerrotaren oroigarria ematearekin batera, 2007/2011 legegintzaldia amaitutzat eman dute gaur goizean Getxoko udaletxean. Larunbat honetan, hilak 11, datozen lau urteetarako udalbatza osatuko dute, goizeko 10etan. Imanol Landa jarduneko alkateak egindako lana eskertu die zinegotziei, Udaleko langileei eta bertan zeudenei. Horren laburpena egin du eta, nabarmendu duenez, "lau urte gogor izan dira, udalbatzak gure herrian izan diren atentatuak, uholdeak, ziklogenesiak eta, oraindik, gaur egun pairatzen ari garen krisi ekonomikoa jasan baititu. Bestalde, indarkeriarik gabeko garai berri baten jaiotzaren lekukoak izan gara eta denok hori betiko aurrera egitea espero dugu". Horrez gain, Landak Gobela ibaia eta egin beharreko gai batzuk ere aipatu ditu: "adostasunean eta lan komunean, gure herriarentzat garrantzitsuak ziren arazo batzuei aurre egin diegu, esate baterako, Gobela ibaiaren egoera; eta egin beharreko jarduerak ere gainditu ditugu; tartean, terrorismoaren biktimak gogoratzeko ekitaldia, baita frankismoarenak eta Gerra Zibilarenak ere”. Argazkian, Imanol Landa Getxoko zinegotzi guztiekin batera udaletxeko sarreran / © Getxoko Udala.
Imanol Landak adierazi duenez, "gauza onekin gelditu nahi dut eta, horrekin batera, borroka politikoan sortutako energia negatiboak alde batera utzi. Izan ere, gure ideologien eta gure iritzien gainetik pertsonak gara". Bere azken hitzak bereziki hunkigarriak izan dira: lau urte hauetan “utzi gaituzten” zinegotziei eta duela gutxi zendu den Aitziber Intxausti bere idazkari izandakoari eskaini dizkie.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun