"Abesbatza Getxoztarren Eguna topagune bilakatuko da eta aurten parte hartzen duten taldeetako kideek elkarren artean harremanak sendotu ahal izango dituzte", jakinarazi dute arduradunek. Koralek eskainiko duten egitarauan herri-abesti ugari bilduko dira, euskaraz zein espainolez. Joan Manuel Serrat, Moises Egaña, Jose Sainz-Basabe, Benito Lertxundi, R. M. Azkue, Tomas Garbizu eta Jesus Guridiren kantak abestuko dituzte saioan, besteak beste.
Horrela, Getxo udalerriko abesbatzen trebeziaz zuzenean gozatu ahal izango dute ekimenera hurbiltzen diren musikazaleek. Saioan parte hartzen duten talde horiek etengabe aritzen dira herri-ospakizunetan, lehiaketetan eta hainbat ekitalditan: Agate Deunako Koru Jaialdia, zenbait herritako Udaberriko Kontzertuetan, edota Bizkaiko Koralen Egunean.
Etzi, igandearekin, Abesbatza Getxoztarren Eguna ospatuko dute Algortako Biotz Alai plazan. Aurtengo edizioa laugarrena izango da eta, guztira, hamar taldek hartuko dute parte, bakoitzak bi kanta eskainiz. Saioa arratsaldeko 6etan hasiko da eta sarrera doakoa izango da. Ekimen horren bitartez, "talde getxoztarrei omenaldia egin nahi zaie eta, horretaz gain, udalerrian errotze handia duen tradizioa bultzatu nahi dugu", adierazi dute antolatzaileek. Saioan honako abesbatzak arituko dira: Biotz Alai, Erromoko Kantariak, Eskuz Esku, Gizatiar, Gorrondatxe, Irutasun, Itxartu, Ondarreta, Tangorako Soinutarrak eta Zozoak. Guztira, 300 bat abeslari bilduko dira ekitaldian. Argazkian, Gorrondatxe abesbatza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun