Landak ere Euskal Herriak bizi duen garai berria izan du aipagai, "indarkeriarik gabeko aro berri hau behin betiko bilaka dadila" desiratuz. Gaurko udal batzarrak irudikatutako argazkia "normaltasuntzat" jo du agintariak. Hori baliatuz, auzokideen arazo eta beharrak konpontzeko asmoz, "adostasun puntuak aztertzera" gonbidatu ditu gainontzeko talde politikoak. Bestalde, Maitane Nerekanek, Bilduk bere zerrendaburua bozkatzeko erabakia arrazoitu du: "Alde batetik uste dugu 7.048 bozka lortu izanak eta ia bosgarren zinegotzia izateak merezi duela alkatetzarako hautagai aurkeztea, herriak erakutsitako indarra Getxoko Udalean garrantzitsua izango dela erakusteko. Bestetik, ezinbestekoa ikusten dugu eskuindarren paradisua den udal honetan, alkatetzarako hautagai ezkertiarra aurkeztea, getxoztar euskaldun, euskaltzale eta ezkertiarren ordezkari izango dena".
Imanol Landa alkatearen diskurtsoa (cc-by-nc-sa Ilanda.eu)
Kargu hartze aurreskua (cc-by-nc-sa Ilanda.eu)
Udalbatza eraketa iruditan
Getxoko udaletxean ez zen ezustekorik espero eta, iragarpenak betez, Imanol Landa Jauregi jelkidea izango da beste lau urtez alkate. EAJ, PP, Bildu eta PSE-EEk bakoitzak bere hautagaia aurkeztu eta alderdi bakoitzeko zinegotziek bereari eman diote botoa. Hartara, inork gehiengo osoa lortu ez duenez, legeari jarraiki, hautagai zerrenda bozkatuenari egokitu zaio aginte makila hartzea; EAJri, alegia. Alkate kargua hartu bezain laster, gainontzeko alderdiei eskua luzatu die Landak, "daukagun helburu nagusia erdiesteko": "Getxo bera eta, horrekin batera, getxoztarren bizi kalitatea hobetzea". Bilduko Maitane Nerekanek, bere aldetik, "indarkeria adierazpen oro amaitzea" eskatu du eta euskal preso politikoak ere izan ditu gogoan; "milaka kilometrotara sakabanatuta ospatuko dutenak". Argazkian, Nerekan, Landa eta Arruek egun Udalean diren hiru belaunaldiak ordezkatzen dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun