Bildu eta EAJren arteko negoziazioen apurketa jeltzaleei leporatu die David Crestelo Bilduko alkategaiak, UKBERRI.NETi egindako adierazpenetan. Bere esanetan, lehenengo batzarrean 15 puntutako programa bat eman zioten EAJri negoziazioak hasteko. Bildukoen harridurarako, "bi minutu baino ez zuten behar izan denari baietza emateko". Halere, hitzarmenarekin batera aurrekontu akordioa sinatu beharko zutela, Uribe Kostako biotopoa bezalako gaiek tokiko EAJrenaz gain Bizkaiko Buru Batzarraren sostengua ere beharrezkoa zela eta konpromiso guztiak publikoak egiteko asmoa zutela esan zietenean, jelkideen jarrera aldatu zela dio Bilduko buruak.
Udalbatzaren eraketa iruditan
Olatu urdinak portu segururaino heltzea lortu du. Izan ere, gaur eguerdian Plentziako Udalbatza berria eratu ondoren, Isabel Zarauza jarduneko alkatea eta hautagai independentea berriz ere hautatu dute hiribilduko mandatari izateko. Bozketan, EAJ eta BIlduren arteko desadostasunak islatu dira, bakoitzak bere hautagaia sostengatu duela. Gauzak horrela, Isabel Zarauzak nahiko izan ditu bere taldeko lau botoak, Jabier Artatza jelkidearen beste lauen eta Bilduren David Cresteloren hiru botoen aurrean. Zarauzak herritarrengandik eta bere taldekideengandik jaso duen konfiantza eskertu du izendatua izan ondoren. "Ohorea da udalerri zoragarri honetako alkatea izatea" esan die bildutako lagunei, irribarretsu. Halere, barkamenak eskatu dizkie azken lau urteotan "kale egin diegula sentitu dutenei". Hemendik aurrera, talde politiko eta hiritar guztiekin lan egiten saiatuko dela agindu du, "batzen gaituzten gauzetan norabide berean arraun eginez eta banatzen gaituzten kontuetan elkarrizketaren bidez". Zinegotzi kargua lehen aldiz eskuratu dutenei ongi etorria eman die Zarauzak, bereziki Bildukoei. Argazkian, Isabel Zarauza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun