Berangon, Anabel Landa berretsi zuten alkatetzan. Bertan, falangistak bezala alkondara urdina eta Espainiako ikur bat zuen gizonezko baten presentzia izan zen anekdota bakarra. Erandion, ordea, hainbat auzotarrak kexatu ziren Joseba Goikouriak, alkate ardura hartzean, sentsibilitate politiko guztiak ordezkatuta zeudelako pozik zegoela esan zuenean. Sortu ilegala dela gogoratu zioten. Udalbatza eta gero, trikipoteoan aritu ziren Bilduren jarraitzaileak. Anekdota gisa, taberna batean batera poteatzen ari ziren EAJ eta PPko zinegotziekin elkartu ziren.
Bego Artze Erandioko Bilduren zinegotziak irakurritako komunikatua (cc-by-sa Bildu)
Getxo udalerrian gertatu bezala, Barrika, Berango, Erandio, Leioa, Lemoiz eta Urdulizko alkatetzak eskuratu zituen atzo EAJk. Urdulizen, Jabier Bilbao jeltzaleak PSE-EEren zinegotzi bakarraren babesa eskuratu zuen. Lemoizen, Unai Andrakak ez zuen inoren laguntza behar izan, hautestontzietan gehiengo osa eskuratu baitzuen, eskualdean EAJk lortu duen bakarra. Leioan, Eneko Arruebarrena aukeratu zuten berriro ere alkate, oraingoan gutxiengoan. Isabel Garcia EBko zinegotziak bere botoa eman zuen eta orain arte bezala Udal Gobernu Taldean jarraituko du. Halere, Arruebarrenak babes gehiago beharko du. Barrikan, EAJko Jose Madariaga jeltzaleak eskuratu zuen alkatetza bi botorekin baino ez. Izan ere, bai EAJk eta bai Bilduk haien hautagaitzak bozkatu arren boto zuri bana eman zuten, Ezpeleta alkate ohiaren iBarrika alderdiak bozketa baldintzatu ez zezan. Argazkian, Eneko Arruebarrena Leioako alkatea artxiboko irudi batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun