Leioa eta Areetako batzarrak Bilboko Arriaga plazako kanpaldiaren inguruan eratu den asanbladaren babesa dauka eta Hartu Bizkaia! ekimenaren baitan kokatzen da. Ekimen horrekin, "haserretuek" jendartea eraldatzeko aurretik lan egiten duten kolektiboekin lankidetza sustatu nahi dute, sarea zabaldu eta indartzeko asmoz. Beste asanblada batzuk iragarri dituzte Erandion eta Sopelan, baina oraingoz ez dute datarik finkatu. Era berean, bere herri edo auzoan batzarra eratu nahi dutenentzat hartubizkaia[abildua]gmail.com posta elektronikoa sortu dute, deialdiak komunikatu eta zentralizatzeko. Getxo udalerriko "suminduekin" harremanetan jartzeko getxom15masanblada[abildua]gmail.com posta elektronikoa erabil daiteke. Leioakoei idazteko, ordea, leioa.hartubizkaia[abildua]gmail.com erabili beharko da.
Areetako asanblada iruditan
Leioako Jose Ramon Aketxe plazak eta Areeta eta Itzubaltzeta / Romoko mugan dagoen Xake plazak hartu zituzten pasa diren ostegun eta ostiralean M-15 mugimenduaren asanblada bana. Leioan, 70 "haserretu" baino gehiago batu ziren eta Areetan, ordea, 100 bat "sumindu" izatera heldu ziren kuxkuxeroen etengabeko joan-etorriaren artean. Bi asanbladetan pertsona batzuk udalerrietako egoeraz mintzatu baziren ere, lehentasuna asanbladen antolakuntza, erritmoak, eremu geografikoa, ezagutaraztea eta informazioaren partekatzea adostea izan zen. Era berean, datorren igandean, hilak 19, maiatzaren 15ean jaiotako mugimenduak Bilboko Jesusen Bihotzetik burutuko duen manifestazioa prestatzen hastea deliberatu zuten bi taldeek. Gauzak horrela, Leioako haserretuak biharko lotu dira Jose Ramon Aketxe plazan, 20:00etan, asanbladaren eta 19ko protestaren propaganda jartzeko. Leioako asanblada, ordea, ostegunero izango da, 20:00etan, Kultur Leioako atearen aurrean. Areetan bildutakoek ordea, posta zerrenda eta bitakora bana sortzea erabaki zuten. Era berean, momentuz Getxo mailako batzarra finkatuko dute eta asanbladak Areetan egingo dituzte ostiralero 19:00etan. Egun eta ordu berberetan egingo dira Bilboko Arriagan Bizkaiko asanbladen koordinazio bilerak. Argazkian, Areetan batutako lagun batzuk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun