Hilaren 24ra arte egongo da zabalik Areetako Kukupraka udal ludotekan 2011-2012 ikasturterako izena emateko epea. Interesatuek Getxo udalerriko herritarrentzako arreta bulegoetan, Gazte Informazio Bulegoan edota www.getxo.net webgunean eskura daitekeen orria bete eta entregatu beharko dute. Horietan txandei, tasei eta beste hainbat gaiei buruzko informazioa agertzen da. Hurrengo ikasturtean, larunbat arratsaldetan ere zerbitzua emango du ludotekak. Horrenbestez, ordutegia honakoa izango da: astelehen, asteazken eta ostiraletan, 17:00etatik 20:00etara, 5 eta 6 urteko haurrentzat; astearte eta ostegunetan, 17:00etatik 20:00etara, 7 urtetik 9ra bitartekoentzat; eta larunbatetan, 10 eta 11 urtekoentzat. Argazkian, Areetako ludotekako umeak judo tailer batean / © Getxoko Udala.
Udan zehar, ludotekak aldaketa batzuk izango ditu familiei laguntza eskaintzeko asmoz. Gauzak horrela, hilaren 24tik irailaren 2ra bitartean bazkideak zein bazkide ez direnak sartu ahal izango dira. Ez da aldez aurretiko izen ematerik egin behar izango, ezta kuotarik ordaindu ere. Nahikoa izango da umea uzterakoan datu batzuk ematea. Gauzak horrela, gurasoek ez dute ludotekaren inguruan egon beharko, umea barruan dagoen bitartean. Edozelan ere, espazio arrazoiak tarteko, behin plazak betez gero, ezin izango da haur gehiago sartu. Iristen diren hurrenkeran sartuko dira neska-mutikoak. Horretarako, ludotekara ireki aurretik, ilaran itxaron beharko dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun