Hondartzetan ur kontsumo arduratsuaren aldeko apustua egin du Sopelako Udalak
Aurtengo hondartzen denboraldiaren hasierarekin batera, hareatzen inguruetan egin ohi den uraren gehiegizko kontsumoaren kontrako sentsibilizazio kanpaina jarri du martxan Sopelako Udalak. Aurreko urtean, 186.007 pertsonek bisitatu zuten Arrietara-Atxibiribil hondartza eta, guztira, 1.625.701 litro ur kontsumitu zituzten. Datu "larria" da. Izan ere, 2009ko datuekin alderatuta, kontsumoa %98a igo zen, tokiko iturriek emandako datuen arabera. Hori dela eta, Barinatxe eta Arrietara-Atxibiribil hondartzetako komun eta dutxetan hainbat kartel jarri dituzte uraren erabilera egokia azaltzen duten jarraibideekin. Bestalde, Uribe Kostako Zerbitzu Mankomunitateko Ekogune bulegoarekin elkarlanean, etxeetan zurrusta-hausteko gailuak banatuko dituzte. Horrela, iturrietan jarrita, airea eta ura nahasi egiten dira presioa egokituz, uraren isuria mugatuz eta horren kontsumoa kontrolatuz. Argazkian, hondartza bat jendez gainezka.
Ur kontsumo arduratsuaz gain, hondartzetara gerturatzeko, kutsadura murrizteko Sopelbus zerbitzua martxan jarri duela gogoratu du tokiko Udalak. Bi autobus-linea daude indarrean, udalerriko hainbat tokietatik igarotzen direnak, 9:30etik 22:20ra. Hondakin bilketari dagokionez, organikoentzako edukiontziaren ondoan hori koloreko bat jarri dute plastikozko eta metalezko materialak bertara botatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun