Atzo tentsio handiko uneak bizi izan ziren metroko nagusien, langileen eta greba batzordeko kideen artean, LAB sindikatuak aitortu duenez. Baina, azkenean, "gutxieneko zerbitzuei buruz ezarritakoa errespetatzea", sindikatuko kideen hitzetan. Hala eta guztiz ere, atzoko lanuzteak "orain arteko arrakastatsuenak" izan direla dio Metro Bilbaoko LABek, "gutxieneko zerbitzuak kenduta, oro har, %85ek eta gidarien %95ek egin dituztelako". Biharko greba egunari begira, "halako larderia eta agintekeriazko jarrerarik" ez errepikatzeko eskatu diote garraio enpresako zuzendaritzari.
Gutxieneko zerbitzuak
Lanuzte eguna deituta dute biharko, osteguna, Metro Bilbao garraio enpresako langileek. Geldialdien bidez, zuzendaritzak "hitzartutako akordioak bete ez eta eskubide sindikalak murriztu nahi dituela" salatuko dute ELA, CIM, UGT, LAB eta ESK sindikatuek; baita “Konfidentzialtasun akordioa” bertan behera uztea eskatu ere. Dagoeneko CCOOk mobilizazioak alde batera uztea erabaki du: sindikatu horrek enpresaren proposamena onartu du. Gainontzeko langile erakundeek goizeko 5:45etik 8:45era arte egingo dute lanuztea bihar. Bitartean, Metro Bilbaoko arduradunek zerbitzu minimoak iragarri dituzte: hamar konboietatik lau aterako dira gutxienez, ohiko zerbitzuaren %40a. Horrenbestez, San Inazio eta Arizen artean 6-7 minuturo ibiliko dira trenak. Bidezabal eta Santurtzira, berriz, 14-15 minuturo. Plentziara heltzea are okerrago egongo da.
BIharko lanuztean "larderia eta agintekeriazko jarrerarik" ez errepikatzeko eskatu dio LABek Metro Bilbaori
Atzoko lanuztean "larderia eta agintekeriaz" jokatzea egotzi dio Metro Bilbao garraio enpresako zuzendaritzari LAB sindikatuak. Lan erakunde abertzaleak azaldu duenez, "Arizko tren gordetegietan egiaztatu ahal izan zen Pertsonen Koordinazio eta Operazioetako nagusiek (gidarien nagusi zuzenak) derrigortzeko jarreraz eta agintekeriaz jokatu zutela, gutxieneko zerbitzuak egokitu zitzaizkien langileei greba batzordean bezperan zehaztutako gutxieneko zerbitzuen aktan zekarren baino zerbitzu gehiago eginarazi guran". "Langileak geldialdia amaitu baino lehen lanean has zitezen saiatu ziren", gaineratu dutenez. Bihar ere lanuztea egingo dute langileek goizeko 5:45etik 8:45era. Hala ere, ez da hori hurrengo hilabetetako mobilizazio bakarra izango. Beharginek asteleheneko asanbladan erabakitzen dutena erabakitzen dutela ere ekainaren 21 eta 23an ere egingo dituzte geldialdiak. Aipatu batzarrean erabakiko dute uztailean eta abuztuan ere protestekin jarraituko duten. Argazkian, aurrekoetan bezala elkarretaratzea egin dute gaur metroko langileek. Oraingo honetan, Eusko Jaurlaritzaren aurrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun