Javier Vargas bluesman madrildarraren eskutik abiatuko da bihar, ostirala, Getxoko 23. Nazioarteko Blues Jaialdia. Aurtengo egitarauak estilo anitzeko artista eta taldeak bilduko ditu, esaterako, Otis Taylor, Corey Harris, Javier Vargas Blues Band, Devon Allman eta Charmaine eta Charles Neville. Horiek guztiek Algortako Biotz Alai plazan joko dute 21:00etan, igandean izan ezik, egun horretan saioa 20:00ean hasiko da eta. Baina, Biotz Alai plazako eskaintzaz gain, ikus-entzuleek doako bi kontzertuz gozatu ahalko dute, Algortako The Piper's taberna irlandarrean. Bertan, gaueko 11etatik aurrera izango dira saioak. Bihar, Los Blues Morning Singers banda getxoztarra, eskarmentu handiko talde elektroakustikoa, arituko da. Etzi, larunbata, Maraya Zydeco soinu-jole asturiarrak Louisianara eramango ditu zaleak, cajun erritmoen bidez. Argazkian, Javier Vargas / © Getxoko Kultur Etxea.
Bluesa Europatik at esportatzea lortu duen artista urrienetariko baten eskutik hasiko da jaialdia: Javier Vargas, hain zuzen ere. Musikari madrildarrak estilo propioa garatzea lortu du, blues latinoa alegia; soinu anitzak uztartzen ditu erro afroamerikarra duen musikarekin. Nahasketa horri esker, artista handiekin lankidetzan jarduteko aukera izan du, hala nola, Lonnie Broks, Larry Graham, Sugar Blue, Larry McCray… Espainia mailako musikari eta talde onenak ahaztu gabe. Vargas Blues Band taldeak, oraingo honetan, Devon Allman gitarra jole eta abeslariaren laguntza izango du. Gregg Allman mitikoaren semea da bera, Allman Brothers banda famatuko kideetako bat, eta blues rock onenaren adibide argienetakoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun