Portu Agintaritzari "greba eskubidea urratzea" leporatu diote Ibaizabalgo atoiontzietako langileek
Ekainaren 13tik 16ra bitarterako greba deituta zeukaten Remolcadores Ibaizabal SA enpresako langileek, tokiko arduradunek laneko sistema aldatzearen erabakia hartu izana salatzeko. Halabaina, gutxieneko zerbitzuak zehaztu behar zituen Bilboko Portu Agintaritza "grebarako eskubidea ezerezean utzi" duelakoan dira beharginak. LAB sindikatuak adierazi duenez, "itsasadarrera heltzen diren ontzietatik gutxieneko zerbitzuetan sartzen direnak zeintzuk diren zehaztu beharrean, bost atoiontzietatik bi jarri dituzte lanean, horiek guztiak mugitzeko. Berdin izan zaie ontziak txatarra zekarren, hutsik zegoen edota gai arriskutsuak zekartzan. Grebalariak deitu dituzte zerbitzu horiek guztiak egiteko". Gauzak horrela, Lan Ikuskaritzan aurkeztu dute salaketa, langileen greba eskubidea urratu egin dutelakoan. Argazkian, Ibaizabalgo atoiontziak Portugalete parean.
Enpresak beste erkidegoetako langileak kontratatu ditu, bestelako lan baldintzak ezarriz. Tokiko beharginek honako laneko sistema daukate: 24 orduz guardian atoiontzietan eta 72 ordutako atsedena, hurrenez hurren. LABek azaldu duenez, "enpresak erabaki du egungo laneko sistema ez dela baliagarria kontratazio berrietarako. Hauei, errotazio sistema zorrotzagoa ezarri die: 72 ordu igarotzen dituzte atoiontzian, 24 orduz atseden hartu eta beste 72 orduz lanean. Ondoren, 15 egunez libratzen dute. Urtean askoz lan egun gehiago, beraz". Horretaz gain, kanpoko langileak "etxebizitzetan pilatuta" izatea egotzi dio enpresari sindikatu abertzaleak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun