Kimika azterketa errepikatzea "bidegabekeria" litzatekeela uste du EHUko errektoreak
Iñaki Goirizelaia EHUren errektoreak baztertu du selektibitateko Kimika azterketa errepikatzea, bere ustez, "bidegabekeria berri bat" litzatekeelako. Radio Euskadiko "Boulevard" saioan egindako elkarrizketa batean, unibertsitateko arduradun nagusiak Kimika etsamina euskaratzerakoan egondako akatsa onartu du. Hala ere, esan duenez, proba izan zen bitartean ikasle "gehienei" akats bat zegoela esan zieten. Eitb.com agerkari digitalak zabaldutakoaren arabera, Goirizelaiak ukatu egin du azterketaren edukia ikasturtean klasean izandakoarekin bat ez datorrenik. Horren ildotik, EHUk "Kimikan eskarmentu handiko hainbat irakasleri galdetu die eta euren txostenak argiak izan dira: edukia bat dator", aipatu duenez. Gainera, errektoreak baztertu egin du "erantzukizuna" eskatzea, hori bai, onartu du gertatutakoa aztertu beharko dutela eta mota horretako azterketetako prozesuak hobetzeko "neurriak hartu" beharko dituztela. Argazkian, Iñaki Goirizelaia EHUko errektorea.
Azterketak sortzerakoan "hainbat filtro" pasatzen direla azpimarratu ostean, berretsi du Kimika azterketa ez dela errepikatuko, "ikasle guztien eskubideak bermatu behar direlako". Goirizelaiak azaldu duenez, emaitzen datuak aztertu eta gero, "nota oso onak" atera dituztenak badaude eta "guk azterketa errepikatzen badugu errepikatu behar dutenen mesedetan, eta aurrekoa egin dutenen kaltetan, egingo genukeen". Errektorearen ustez, "ez dago guztiok asetuko dituen konponbiderik" eta "kontuan izan behar da oinarria guztien eskubideak babestu eta errespetatzea dela". "Orain ezin da zuzen eginda zegoen, eta gauza sinple batean akats bat izan duen, azterketa bat errepikatu, baina konponduta dago; ez da kontuan hartu edo ikaslearen mesedetan kontuan hartu da", amaitu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun