Sirokaren oharra
Gaur, ekainaren 21a, Siroka taldeak EITB-ko "Arratsaldero" saioan eskaini behar zuen elkarrizketa zentsuratu du saio honetako zuzendariak. Talde honetako partaideei soinean jarrita zeramatzaten "euskal presoak euskal herrira" txapa kentzea eskatu diete eta haiek ezezkoa eman ondoren, programa uzteko gonbitea jaso dute.
Siroka taldeak EITBren jarrera faxista salatu nahi du lehenik eta behin. Horrelako jarrerak, ezagun egiten zaizkigun arren, iraganeko gauza izatera pasatzea gustatuko litzaiguke.
Bestalde, hainbatetan egin dugun moduan, bai publiko zein pribatuan, euskal preso, iheslari eta errefuxiatuen eskubideak errespetatzearekiko gure konpromiso tinkoa azaldu nahi dugu.
Zintzilik abestiaren bideoklipa (cc-by-sa Siroka - Lordwalking)
Uribe eta Enkarterrietako Siroka musika taldeak elkarrizketa eskaini eta abesti bat jotzekoa zen gaur ETB1-eko "Arratsaldero" magazinean, "Karosi" disko berria aurkezteko. Halere, Sirokakoen agerpena aurkeztu ostean, publizitate tarte batean taldea probak egiten ari zela, Iñaki Urdanpilleta saioaren zuzendariak euskal presoak euskal herriratzearen aldeko txapa kentzeko agindu dio musikarietako bati. Programan horrelako kontuen publizitatea ez dutela onartzen iradoki diete orduan musikariei. Musikarien arabera, txapa kentzeari ezezkoa eman ondoren, "programa uzteko gonbitea" jaso du laukoteak. Sirokak "EITBren jarrera faxista" salatu du. Taldearen iritziz horrelako gertaerak "iraganeko gauza" izan beharko lirateke. Era berean, "euskal preso, iheslari eta errefuxiatuen eskubideak errespetatzearekiko gure konpromiso tinkoa" berretsi dute. Iaz, ETB1-eko "Sut&Blai" saioan egon zen Siroka, arazorik gabe. Argazkian, Siroka taldea / cc-by Goio Ramos.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun