Gaurko ekintzarekin eta datozen asteotan egingo diren beste batzuekin, greba batzordeak bere mezua helarazi eta zabaldu nahi dio gizarteari, "auzia denboran luzatzearen benetako arduraduna Iñaki Prego Kontseilari Ordezkaria dela ohartarazteko". LABek zorionak eman dizkie mobilizazioan parte hartu duten ehunetik gora pertsonei. "Nabarmendu nahi dugu, halaber, Metro Bilbaon ordezkatuta dauden indar sindikalen artean batasun handia dagoela", azpimarratu dutenez.
Mobilizazioen bideoa (© LAB Metro Bilbao)
Geltokietan barrena aldarrikatu dituzte beraien eskubideak Metro Bilbaoko langileek
Greba batzordeak deituta, Metro Bilbao garraio enpresako ehun langile baino gehiago elkartu dira gaur goizean Bilboko Plaza Zirkularrean. Bertan, 20 minutu luzez oihukatu dituzte zuzendaritzaren kontrako eta langileen eskubideen aldeko leloak eta orriak banatu dizkiote kaletik zebilen jendeari, LAB sindikatuak azaldu duenez. Ondoren, Abandoko geltokira jaitsi dituzte aldarriak. Langile erakunde abertzalearen arabera, lasai, baketsu ibili dira metroko beharginak Abandoko nasetan eta sarbideetan, "Adierazpen askatasuna" (konfidentzialtasunaren kontuarengatik), "Lan eta sindikatu eskubideen alde" eta "Lanpostu murrizketarik ez" irakur zitekeen kartelak zeramatzatela. Trena hartu eta San Inaziora joan dira gero, mobilizazioarekin aurrera, Pertsonen Koordinazio eta Operazioetako nagusien bulegoen aurrean protestatzera: ekainaren 14ko lanuzteetan lau gidari "derrigortu eta mehatxatu" zituztela salatu zuen LABek. San Inazioko nasetan 15 minutuz edo ibili dira "Zuzendari gutxiago, langile gehiago" eta "Prego kanpora" oihukatzen eta hor amaitu da biharko aurreikusita dagoen lanuztean (5:45 eta 8:45 artean) parte hartzera deituz. Bitartean, Metro Bilbaoko arduradunek gutxieneko zerbitzuak iragarri dituzte. Argazkian, metroko langileak San Inazioko geltokian / © LAB Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun