"Lelo politiko guztiak zentsuratzen" dituztela diote "Arratsaldero"-ko arduradunek

Pasa den asteartean, Uribe eta Enkarterrietako Siroka musika taldea ETB1-eko "Arratsaldero" magazinetik kanpo utzi zuten Maria Ribero abeslariak zeraman euskal presoak euskal herriratzearen aldeko txapa kentzeari uko egin ziolako. Zentsura salatu zuen orduan taldeak. Gaur, berriz, Arri Granados "Arratsaldero" saioko ekoizle eragileak gertatutakoa kontu orokorra dela adierazi du, "Berria" egunkariak zabaldu duenez. Granadosek aitortu bezala, "guk ez dugu lelo politikoak agerian azaltzen uzten. Baina ez orain ez inoiz. Eta hemen ez da txaparik azaltzen, ez PPren aldekoak ez PSEren aldekoak. Lelo politiko guztiak zentsuratzen ditugu, baina iritzi politikoak sekula santan ez ditugu zentsuratu". Gainera, betikotzat jo du jarrera hori K-2000 ekoizpen etxean zein ETBn. Halere, ukatu du presoen aurkako ildorik dagoenik. "Hortik aurrera, bakoitzak nahi duena esateko aukera du", azaldu dio Granadosek "Berria"-ri. Argazkian, Siroka taldea / cc-by Goio Ramos.