Egunotan San Juan jaiak ospatzen ari badira ere, Palestinarekiko elkartasunerako tartea bilatu dute leioaztarrek. Gauzak horrela, Gazarako Norabidean ekimenak abian jarritako Askatasun Ontzidi berriari buruzko batzarra egingo dute bihar Leioako Ikeamendi kaleko 12. zenbakiaren atzealdean, Saharako lokalean. Hitzordua 17:00etan jarri dute eta antolatzaileek leioaztar zein interesatu oro gonbidatu dute. Bertaratzerik ez duenak ere informazioa eskuratu ahal izango du euskadi[abildua]rumboagaza.org posta elektronikora idatziz. 2010eko maiatzaren 31n, Israelen Armadak Gazaren blokeoa apurtu nahi zuen Askatasun Ontzidia erasotu eta 19 boluntario erail zituen. Datozen egunotan, berriz, Euskal Herriko, Herrialde Katalanetako eta Espainiako 50 bat boluntario aterako dira Gazarantz Gernika itsasontzian. Argazkian, aurreko ontzidian egindako sarraskia salatzeko Bilbon egin zuten manifestazioa / © Askapena.
Jakiak eta botikez gain, itsasontziak Gernika-Lumoko Udalak oparitutako "Guernica" koadroaren berrikusketa eramango du Gazara, elkartasun keinu gisa. Dagoeneko Israelgo Armadak mehatxu argiak bota ditu. Esaterako, pasa den igandean, Eliezer Marom Itsas-Armadako komandanteak "Ontzidi gorrotagarria" abordatzeko frankotiratzaileak eta komando bereziak prest dituela adierazi zion "Haaretz" egunkari israeldarrari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun