5.000 baietz! ekimenak gogoratu du horrelako zigorrak ez direla berriak Itzubaltzeta / Romon zein Euskal Herrian. "Estatuak kontrolpean dituen mekanismo guztiak erabiltzen ditu euren kontra agertzen diren ahotsak isilarazteko. Kaleak mutu nahi dituzte. Dena normaltasunez doanaren gezurrezko irudia emateko. Kaleko hormak grisak nahi dituzte, kolore desberdinek euren "status quo"-a kolokan jartzen dutelako. Errepresio ekonomikoa jendartea beldurtu eta diruz itotzea dauka helburu", salatu dutenez.
Horren aurrean, "kaleak herriaren bozgorailuak" izaten direla eta horrela izaten jarraitu behar dutela azpimarratu dute. Ildo horretan, "ahotsak, oihuak, aldarrikapenak nahi ditugu kaleetan. Berdea, morea, gorria... nahi ditugu ikusi margo zentsuratzailearen gainetik".
Bizilagunei "laguntza eta babesa" eskatu diete hiru auzokide zigortuentzat, "adierazpen askatasuna urratzen dutenean denok baikara kaltetuak". Oraingoz, isunak ordaintzeko hainbat lapiko jarri dituzte herriko denda eta tabernetan.
Manifestazioa eta agerraldia iruditan
Itzubaltzeta / Romoko 80 bat auzokidek manifestazioa eta agerraldia (mp3) egin dituzte gaur iluntzean "isun injustua jasan duten" herrikideei elkartasuna adierazteko eta "Estatuari bakean utz gaitzala" exijitzeko. Izan ere, 5.000 baietz! ekimeneko kideek gogoratu dutenez, 2010eko irailaren 18an A.S. Itzubaltzeta / Romoko gaztea, euskal presoen aldeko aldarrikapen baketsua egiten zegoen momentuan, ertzain batek atzetik kolpatu, lurrera bota eta atxilotu zuen. Egun, 2.000 eurotako isuna eskatzen dio epaileak "agintzaritzaren aurkako atentatua” delako aitzakiaren pean. 2010eko urriaren 22an, berriz, Imanol Beristain kidearen aldeko manifestazio baketsuan, J.I. eta I.l. Itzubaltzeta / Romoko bizilagunak geldiarazi, identifikatu eta aurrera jarraitzeko esan zien ertzainburu batek. Egun, 3.000 eurotako isuna eskatzen die epaileak "irainak eta mehatxuak" aitzakiaren pean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun