Guztira, 3.500 lagun inguru bildu ziren ostegun gauean San Juan gaua ospatzeko, Arrigunaga hondartzan eta inguruetan, Getxoko Udaltzaingoak emandako datuen arabera. Iaz 7.000 pertsona izan ziren gune horretan batu zirenak. Istiluak eta auzokideei eragozpenak murrizteko helburuarekin polizia operazio berezia zabaldu zuten. Aurten, Arrigunagan ez ezik, Ereaga hondartzan eta inguruetan ere bildu ziren gazteak. DYAk 9 lagun artatu zituen, danak edanda zeudelako. Halaber, udaltzainek 450 litro alkohol atzeman zizkieten adin gabekoei, bi aizto eta pare bat labanekin batera; eta 10 salaketa ipini zituzten kalean txiza egiteagatik. Bestalde, hondartzan eta inguruetan izandako lau liskarretan Barakaldo, Bilbo eta Ortuellako bost gazte identifikatu zituzten. Gainera, goizeko 6ak aldera, Borobia plazan zegoen anbulantziak ebaki sakona zuen gazte bat artatu behar izan zuen. Argazkian, San Juan gaua Arrigunagan / © Getxo.net.
Metroko lehen unitateetarako sarrera behar bezala kontrolatu zuten poliziek bidaiari-oldea bideratzeko asmoz. Guztira, 1.200 bat lagun sartu ziren trenera eta, goizeko seiak aldera, jai esparrua hustu egin zen. "Balantze bezala, San Juan gauerako antolatutako zaintza jarduera bereziak ahalbidetu du gaua nolabaiteko normaltasunarekin eta aurreko urteetan baino istilu gutxiagorekin igarotzea", Josu Loroño Komunikazio zinegotziaren iritziz. Gainera, egindako aurrezaintza jardueraren eraginez, "jaia ospatzera udalerritik kanpoko jendea gero eta gutxiago" datorrela aipatu du. Guztira, 729 borondatezko alkoholemia-proba egin zituzten gazteek zelan zeuden jakiteko eta beste hainbat opil eta palmera banatu ziren alkoholaren eragina arintzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun