Talde feministen arabera, "emakumeon kontrako indarkeriak ez du etenik". Bilgune Feministaren ustez, "berdintasunaren bidean aurrerapausoak eman diren garai hauetan, badaude jendartea hainbeste aldatu ez dela erakusten diguten eta irauten duten arazoak. Asko eta asko dira emakumeok pairatzen ditugun bazterketa eta indarkeria egoerak, batzuk sutilagoak beste batzuk begi-bistakoak, baina denak patriarkatuaren ondoriozkoak, gaurkoan tristeziaz eta amorruz salatzera goazen Joneren heriotza bezala".
Eragile honek sostengatzen duenez, Jonerena ezin da kasu isolatu gisa hartu eta errotiko erantzuna ematea eskatu diete eragile guztiei: "patriarkatua elikatzen duten instituzio, egoera, talde zein norbanakoei eraldaketarako apustua egin dezaten eskatzen diegu; baita ere, aldatzeko asmoa dugunon konpromisoa, jendarte askea eta justuagoa eraiki nahi badugu patriarkatua suntsitu behar dugulako!".
Horregatik, "promesa eta inoiz heltzen ez diren aldaketekin" jada "nazkatuta" daudela adierazi eta autodefentsarako deia egin dute. "Mugimendu feministatik apustu berezi bat egiten dugu autodefentsa feministaren alde, biktimismoa eta datu eskabrosoen gainetik, emakumeok bortizkeriaren kontra egin behar dugulakoan baikaude, gure egunerokotasunean autodefentsa feminista errealitate bat bihurtuz", Bilgune Feministak azaldu duenez.
Durangoko emakume gaztearen erailketa sexista salatuko dute arratsean Algortan
Emakumeen Mundu Martxak zein bertan parte hartzen duen Bilgune Feministak deituta, hilaren 16an Durangon hilik topatu zuten emakume gaztearen ustezko erailketa salatuko dute gaur arratsaldean Algortan. Feministek jakinarazi dutenez, elkarretaratzea 19:30ean izango da Telletxe plazan. Durangoko biktimak Jone zuen izena eta 31 urte zituen. Hasiera batean, Ertzaintzak emakumeak bere buruaz beste egin zueneko teoria mantendu bazuen ere, aste honetan ustezko hiltzailea, Joneren bikotekidea, harrapatu eta "emakumeen kontrako indarkeriaren ondorioz hil zela baieztatu dute", Euskal Herriko Emakumeen Mundu Martxako Plataformaren arabera. Gertaera egiaztatzekotan, Jone indarkeria sexistak Euskal Herrian aurten erail duen bigarren emakumea litzateke. Apirilaren hasieran Yanela Zaruma 22 urteko emakumea hil zuen bikotekide ohiak, eta epailearen aurrean aitortu egin zuen. Dena den, feministek ez dituzte oraindik argitzeke dauden beste bi kasu, martxoan Azpeitian eraildako Amaia Azkuerena zein 2009tik desagertuta dagoen Nora izeneko gasteiztarrarena. Argazkian, Algortako Bilgune Feministaren protesta bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun